रेडियो आहाले विभिन्न क्षेत्रमा योगदान पुर्याएका व्यक्तिलाई दियो सम्मान, वाग्लेलाई महिला सशक्तीकरण

६ भदौ, काठमाडौं । रेडियो आहा १०४.५ मेगाहर्जले आफ्नो स्थापनको तेस्रो वार्षिकोत्सव मनाएको छ । सो अवसरमा विभिन्न क्षेत्रमा योगदान पुर्याएका व्यक्तित्वलाई नगदसहित सम्मान गरियो । रेडियो आहा सञ्चारकर्मी हेम सुवेदीद्वारा सञ्चालित रेडियो हो । उनले विभिन्न क्षेत्रमा योगदान गरेका व्यक्तित्वहरुलाई संस्थाका तर्फबाट सम्मान दिएका हुन् ।    

वार्षिकोत्सव कार्यक्रमको प्रमुख अतिथिका रुपमा नेपाली कांग्रेसका महामन्त्री गगन थापालाई आमन्त्रण गरिएको थियो । रेडियो आहाद्वारा सम्मान दिएका किरण खरेललाई रेडियो आहा राष्ट्रिय संगीत विरासत सम्मान, सञ्चारकर्मी सिर्जना वाग्लेलाई महिला सशक्तीकरण सम्मान र दिक्षा चापागाईंलाई सामाजिक परोपकारबाट सम्मान गरियो । प्रमुख अतिथि थापाले सम्मानित व्यक्कितहरुलाई नगदसहित कदरपत्र प्रदान गरेका थिए ।  

कार्यक्रममा देउडा सम्राट नन्दकृष्ण जोशी, हास्य कलाकार श्रीकृष्ण सिंखडा, गायक शिशिर योगीलगायतका कलाकारले आफ्नो प्रस्तुति प्रस्तुत गरेका थिए भने संगीतकार भुपेन्द्र रायमाझीको सांगीतिक समूहले रेडियो आहाको जन्मदिनको शुभकामना गीत गाएका थिए ।

रेडियो आहाबाट ‘महिला सशक्तिकरण सम्मान २०८१’ बाट सम्मानित हुने सिर्जना वाग्ले सञ्चारकर्मी हुन् । उनी पत्रकारितासहित नारी सशक्तिकरण अभियानमासमेत सम्लग्न छिन् । उनलाई नगद ११ हजारसहित ताम्रापत्रले सम्मान गरिएको थियो । तनहुँ जिल्लाको क्यामिनमा जन्मेकी वाग्ले व्यवस्थापन संकायमा स्नातकोत्तर छन् । उनी हाल अर्थ सन्जाल मिडियाकी प्रधानसम्पादक हुन् ।