टीआरसी विधेयकबाट पीडकलाई उन्मुक्ति दिने प्रावधान संशोधन गर्न द्वन्द्वपीडितको माग

६ भदौ, काठमाडौं । नेकपा माओवादीको सशस्त्र विद्रोहको समयमा परिवार गुमाएका पीडितहरुले टीआरसी विधेयकमा राखिएको पीडकलाई उन्मुक्ति दिने प्रावधान हटाउनुपर्ने माग राखेको छ । उनीहरुले यो प्रावधान हटाउन माग गर्दै नयाँ बानेश्वरमा प्रदर्शन गरेका छन् ।

बिहीबार दिउँसो द्वन्द्वपीडितहरूको विभिन्न समूहका प्रतिनिधिहरू उपस्थित भई नयाँ बानेश्वरमा शान्तिपूर्ण प्रदर्शन गरेका हुन् । उनीहरूले संक्रमणकालीन न्यायसँग सम्बन्धित टीआरसी विधेयक सर्वोच्च अदालतको फैसलाहरु अनुरूप संशोधन गर्नुपर्ने माग गरेका छन् ।

सत्यनिरूपण तथा मेलमिलाप र बेपत्ता छानबिनसम्बन्धि विधेयक प्रतिनिधि सभाबाट पारित भई राष्ट्रिय सभामा छलफलको क्रममा छ । आन्दोलित द्वन्द्वपिडितहरूले पीडकलाई उन्मुक्ति दिने प्रावधानहरू राष्ट्रिय सभाले संशोधनगर्न माग गरेका हुन् । प्रदर्शनमा विभिन्न जिल्लाका द्वन्द्वपीडितहरू सहभागी थिए ।