रवि लामिछाने गरेका ठगी, भ्रष्टाचार र अपराधका प्रमाण म दिनसक्छुः ढकाल

७ भदौ, काठमाडौं । राष्ट्रिय स्वतन्त्र पार्टीका निलम्बित महामन्त्री डा. मुकुल ढकालले सभापति रवि लामिछानेले गरेका ठगी, भ्रष्ट्राचार र राहदानी दुरूपयोग गर्ने अपराधका प्रमाण आफूसँग भएको बताएका छन् । उनले रवि लामिछाने ठग र भ्रष्टाचारी व्यक्ति भएको दावी गरेका छ ् । 

शुक्रबार सामाजिक सञ्जालमार्फत पार्टीले अन्तिमपटक सोधेको स्पष्टीकरणको जवाफ पेस गर्दै उनले रविको कुकर्मको पर्दाफास गर्नु पार्टीविरुद्ध लाग्नु नभएको बताएका छन् । भदौ ५ गते बसेको रास्वपाको केन्द्रीय समिति बैठकले ढकाललाई  साधारण सदस्यबाट पनि किन नहटाउने भन्दै स्पष्टीकरण माग गरेको थियो । 

उनले त्यसको जवाफ दिँदै आफूमाथिको कारबाही पार्टीको विधान, नियमावली,कार्यविधि, पार्टी केन्द्रीय समितिको विगतको निर्णयको बर्खिलाप भएको बताएका छन् । पार्टीलाई स्वार्थको झुन्डबाट बचाउन आफूले केही कदमहरू चालेको बताउँदै उनले त्यो कदमलाई पार्टीको हित विपरीत भन्नु सरासर गलत भएको दावी गरेका छन् । 

यसअघि ३० साउनमा पनि रास्वपाले मुकुलसँग २४ घण्टे स्पष्टीकरण सोधेको थियो। जसको जवाफमा ढकालले सभापति रवि लामिछानेलाई नैतिक धरातलमा उभिएको पुष्टि गर्न चुनौती दिएका थिए। रास्वपाले २५ असारमा ढकाललाई महामन्त्री,प्रवक्ता र केन्द्रीय सदस्यबाट हटाएको थियो।  

सचिवालयले सोधेको स्पष्टीकरणमा ढकालले चित्त बुझ्दो जवाफ नदिएपछि केन्द्रीय समिति बैठकले दोस्रोपटक स्पष्टीकरण सोध्ने निर्णय गरेको हो । उनले दोस्रो पटक स्पष्टीकरण सोधेर सभापति रवि लामिछानेले पार्टीमा विधिविधान विपरीत,थितिरहित हैकमे निरंककुश शासन चलाइरहेको आरोप लगाउँदै आफू पार्टी जोगाउन लागिपरेको बताएका छन् । 

उनले आफूमाथि गरिएको कारबाहीको कागजात प्रमाणहरूको प्रतिलिपि माग्दा सभापति लामिछानेले उल्टै स्पष्टीकरण पठाएको आरोप लगाएका छन् । ‘तपाईं ठग, भ्रष्ट्राचारी र राहदानी दुरूपयोग गर्ने अपराधी हो भनेर प्रमाणित गर्न सक्छु । कारबाहीको दुस्साहस गर्दै हुनुहुन्छ, सक्नुहुन्छ भने मलाई गलत सावित गर्नुहोस्,’ मुकुलको चुनौती छ ।