भारत भ्रमणबारे कांग्रेस बैठकमा परराष्ट्रमन्त्री आरजुको ब्रिफिङ, नयाँ सरकारप्रति मोदीको गुनासो छैन

७ भदौ, काठमाडौं । परराष्ट्रमन्त्री आरजु राणा देउवाले भारतको औपचारिक भ्रमणबारे पार्टी केन्द्रीय समिति बैठकलाई जानकारी गराएकी छन् । उनले शुक्रबार सानेपामा बसेको केन्द्रीय समिति बैठकमा भारत भ्रमणबारे ब्रिफिङ गरेकी हुन् । आरजुले गत आइतबारदेखि बिहीबारसम्म भारतको औपचारिक भ्रमण गरेकी थिइन् ।

बैठकमा उनले नेपाल सरकार र नेपाल भारत सम्बन्ध विस्तारका विषयमा भारतीय प्रधानमन्त्री नरेन्द्र मोदी सकारात्मक रहेको बताइन् । कांग्रेस र एमाले मिलेर बनाएको सरकारप्रति भारतको रेस्पोन्स राम्रो रहेको उनले बताइन् । परराष्ट्र मन्त्री राणाले भदौ ३ गते भारतीय प्रधानमन्त्री मोदीसँग शिष्टाचार भेटवार्ता गरेकी थिइन् । नेपालको विकासमा सहयोग गर्न तयार रहेको भारतीय प्रधानमन्त्री मोदीको भनाइ रहेको  मन्त्री राणाले जानकारी गराइन् । 

परराष्ट्र मन्त्री राणाले प्रधानमन्त्री केपी शर्माका तर्फबाट भारतीय प्रधानमन्त्री मोदीलाई नेपाल भ्रमणको निम्तो दिएको र उपयुक्त समयमा मोदी नेपाल भ्रमणमा आउने जानकारी पाएको उनले बताइन् । सोही दिन उनले भारतीय विदेश मन्त्री एस जयशंकरसँग पनि भेटवार्ता गरेकी थिइन् । भारतीय विदेश मन्त्री जयशंकरको निम्तोमा परराष्ट्र मन्त्री राणाले भारको भ्रमण गरेकी थिइन् ।

नेपालको विकासका गति अगाडि बढ्ने भारतीय पक्षको विश्वास पाएको उनले सुनाइन् । नेपाल भ्रमणमा रहेका चिनियाँ मन्त्रीसँग शुक्रबार भेट भएको पनि उनले जानकारी गराइन् । ‘बीआरआईको मोडालिटीबारे कुरा गर्न खोज्नु भएको रहेछ, मैले हाम्रो पार्टीको यस्तो–यस्तो छ । हामीले पास गरेर दिइसकेका छौं । मोडालिटी के हुनसक्छ भन्छौं भनेको छु,’ परराष्ट्रमन्त्री देउवाले केन्द्रीय कार्यसमिति बैठकमा भनिन् ।