रामेछापमा पहिरोले घर बगाउँदा २ जनाको मृत्यु, केही बेपत्ता

९ भदौ, मन्थली । रामेछापमा पहिरोले घर बगाउँदा दुईजनाको मृत्यु भएको छ भने ८ जना बेपत्ता भएका छन् । दोरम्बा शैलुङ गाउँपालिका ३ टोकरपुरको लेखखर्कमा गएराति पहिरोले चारवटा घर बगाएको थियो । पहिरोले स्थानीय उर्मिला पहरी, काले पहरी, भीमबहादुर थापा मगर र अर्को एक घर बगाएको बताइएको छ ।

पहिरोमा पुरिएका मध्ये २ जनाको शव फेला परेको रामेछापका प्रहरी निरीक्षक कौशल न्यौपानेले जानकारी दिए । उनीहरुको पहिचान हुन बाँकी रहेको जनाएको छ । पहिरोले दोरम्बा शैलुङको वडा नम्बर २ र ३ को सीमा क्षेत्रमा पर्ने अधेरी खोलाको पक्की पुल समेत बगाएको छ । पहिरो गएको गाउँ जाने बाटोसमेत क्षतिग्रस्त भएकाले उद्धारमा समस्या भएको बताइएको छ ।