धनगढीस्थित कांग्रेस सभापति देउवाको घर अगाडि भेटिएको शंकास्पद वस्तु बम नभएको पुष्टि

९ भदौ, काठमाडौं । नेपाली कांग्रेसका सभापति शेरबहादुर देउवाको धनगढीस्थित निवास अगाडि भेटिएको शंकास्पद वस्तु बम नभएको पुष्टि भएको छ । उक्त शंकास्पद बस्तु नेपाली सेनाले निष्क्रिय बनाएको छ ।

बम भएको आशंकामा घटना स्थल पुगेको नेपाली सेनाको तेघरी ब्यारेक अत्तरियाको बम डिस्पोजल टोलीले उक्त वस्तु निष्क्रिय पारेको हो ।

जिल्ला प्रहरी कार्यालय कैलालीका प्रवक्ता कविन्द्र बोहराका अनुसार शंकास्पद झोलाभित्र माटो र माटोमुनि एउटा भाँडो भेटिएको थियो । उक्त वस्तु विस्फोटक भएको देखिएन ।

आज बिहान देउवा निवास अगाडि कालो रंगको पुरानो झोला फेला परेको थियो । त्यो झोला भित्रबाट तार बाहिर निस्किएको देखिएको थियो । तार बाहिर निकालिएका कारण स्थानीयले त्यो विस्फोटक पदार्थ पनि हुनसक्ने आशंका गरेका थिए ।