भारतको बिहार राज्यमा ४३ जना नेपाली तीर्थयात्री बोकेको बस दुर्घटना, २५ जना घाइते

९ भदौ, बारा । भारतको बिहार राज्यको समस्तीपुरमा आइतबार बिहान नेपाली तीर्थयात्री बोकेको बस दुर्घटना भएको छ । भारतीय सञ्चारमाध्यमका अनुसार ना ७ ख ६४४६ नम्बरको बस समस्तीपुरस्थित मुसरीघरारी थाना क्षेत्रमा पर्ने एनएच २८ राजमार्गमा दुर्घटना भएको हो ।

बारा जिल्लाको बारागढी गाउँपालिका वडा नम्बर ३, मूर्तिपालियाबाट बोलबम तीर्थयात्राका लागि गएको थियो । सो बस विहान दुर्घटनामा परेको बारागढी गाउँपालिकाका अध्यक्ष अशोककुमार जैलसवालले बताए । उनले दुर्घटनाको प्रारम्भिक खबर आएको बताए ।  

नेपाली तीर्थयात्री बोकेको बसलाई एउटा ट्रकले ठक्कर दिएको र बस सडकमै पल्टिएको बताइएको छ ।  सो दुर्घटनामा कम्तीमा २५ जना तीर्थयात्री घाइते भएका छन् । बसमा ४३ यात्री सवार रहेको जनाइएको छ । घाइतेको स्थानीय अस्पतालमा उपचार भइरहेको छ ।