ठमेलबाट झन्डै ४ करोड मूल्य बराबरको कोकिनसहित आइभरीकोस्टका कोन पक्राउ

९ भदौ, काठमाडौं । नेपाल प्रहरीले झन्डै ४ करोड मूल्य बराबरको लागु औषध कोकिनसहित एक विदेशी नागरिकलाई पक्राउ गरेको छ । १ किलो ८८ ग्राम कोकिनसहित आइभरीकोस्टका  ३५ वर्षीय नागरिक वारामा कोन पक्राउ परेका हुन् । 

उनलाई लागु औषध नियन्त्रण ब्यूरोको टोलीले ३ भदौमा ठमेलको ज्याठास्थित एक होटलबाट पक्राउ गरेको हो । इथियोपियाबाट दोहा कतार एअरवेयमार्फत् उनी काठमाडौं आएका थिए । उनले उक्त कोकिन निलेर काठमाडौं ल्याएको पाइएको ब्युरोका डीएसपी प्रेमबहादुर शाहीले बताए ।

गत भदौ ३ गते कतार एयरलाइन्सको उडानद्वारा नेपाल आएका उनलाई कोकिनका ६९ वटा क्याप्सुलसहित जिल्ला राजधानीको ठमेल ज्याठास्थित होटेलबाट पक्राउ गरिएको थियो । उक्त कोकिनका क्याप्सुलहरू निजले खेलौनाभित्र लुकाएर राखेको अवस्थामा बरामद गरिएको हो ।