लेखा समितिको सभापति चाहिने भए प्रचण्ड र देउवालाई भन्नुस, यहाँ भाषण गरेर हुँदैनः पोखरेल

९ भदौ, काठमाडौं । नेकपा माओवादीका सांसदले लेखा समितिको सभापति प्रमुख प्रतिपक्षी दलले पाउनुपर्ने भन्दै समितिको बैठकमा प्रश्न उठाएपछि सार्वजनिक लेखा समितिका सभापति ऋषिकेश पोखरेलले सभापति चाहिने भए शीर्ष नेतालाई भन्नु पर्ने बताएका छन् । उनले आफ्नो पदमाथि प्रश्न उठाएकोमा आपत्ति पनि जनाएका छन् । 

प्रतिनिधिसभा अन्तर्गतको सार्वजनिक लेखा समितिको आइतबारको बैठकमा सभापतिबाट पोखरेलले राजीनामा गर्नुपर्ने विषय माओवादीले उठाएको थियो । प्रमुख प्रतिपक्षी दल माओवादी केन्द्रका सांसदले सार्वजनिक लेखा समिति सभापति विपक्षी दलको हुनुपर्ने माग गरेका थिए भने कांग्रेसका सांसदले संसदीय अभ्यासमा लेखा समितिको नेतृत्व प्रतिपक्षले पाउने स्मरण गराएका थिए ।

सभापति पोखरेलले यस्तो विषय फेरि नउठाउन आग्रह गरे । सभापतिको विषय फेरिदेखि नउठाइदिनुहोला । सभापति चाहिने भए आफ्ना अध्यक्षहरू प्रचण्ड र देउवा अगाडि भाषण गर्नुहोला । आफ्ना पार्टीका अध्यक्षहरू अगाडि १ घण्टा भाषण गर्नुहोला, समितिमा फेरि यो विषय नउठाइदिनुहोला भन्ने आग्रह गर्दछु,’ उनले भने ।

आफूले कुनै पार्टीमा निवेदन हालेर लेखा समितिको सभापति पद नमागेको पनि पोखरेलको भनाइ थियो । उनले राजनीतिक पार्टीमा जे निर्णय र सहमति हुन्छ त्यो मान्ने तर समितिमा उठाएकै भरमा राजीनामा नदिने अडान राखे । सभापतिमा सत्ताको छाया पर्न नहुनेमा आफू सचेत रहेको पनि पोखरेलको भनाइ थियो । ’सभापतिको कुर्सीबाट निर्णय दिने कुरामा सत्ताको कुनै छाया पर्नु हुँदैन भन्ने कुरामा म सचेत छु । त्यो छाया पर्न आजका मितिसम्म दिएको छैन होला भन्ने विश्वस्त छु,’ उनले भने ।

समितिमा माओवादी केन्द्रका सांसदहरू अमनलाल मोदी र लेखनाथ दाहालले विषक्षलाई सार्वजनिक लेखा समितिको सभापति दिनुपर्ने विषय राखेका थिए । एमालेका सांसद गोकुल बास्कोटा र योगेश भट्टराईले भने प्रतिपक्षलाई समिति सभापति दिन नसकिने अडान राखेका थिए । बास्कोटाले सार्वनिक लेखा समिति सभापति माग्ने भए उपसभामुख र राष्ट्रिय सभा अध्यक्ष पनि परिवर्तन गर्नुपर्ने भनेका थिए । 

कांग्रेसका सांसद अर्जुननरसिंह केसीले भने सार्वजनिक लेखा समितिको सभापति प्रतिपक्षलाई दिने संसदीय अभ्यास रहेकाले माओवादीका सांसदहरूले उठाएको विषय सही भएको बताएका थिए । यसअघीको प्रतिनिधिसभामा एमालेले संसदीय समिति बैठक बहिष्कार गरेको कुरा केसीले स्मरण गराएका थिए ।