परराष्ट्रमन्त्री राणाको निमन्त्रणामा ओमानबाट पहिलो उच्चस्तरीय भ्रमण

१० भदौ, काठमाडौं । आज साँझ ओमानका विदेशमन्त्री सइद बद्र बिन हमाद बिन हमुद बल्सुसैदी नेपाल आइपुग्दैछन् । उनी दुईदिने औपचारिक भ्रमणका लागि नेपाल आउन लागेका हुन् । दुई मुलुकबीचको कूटनीतिक सम्बन्ध स्थापना भएपछि पहिलो पटक ओमानबाट उच्च भ्रमण हुन लागेको हो ।

परराष्ट्रमन्त्री आरजु राणा देउवाको निमन्त्रणामा नेपाल आउन लागेका विदेशमन्त्री बल्सुसैदी मंगलबार बिहान परराष्ट्रमन्त्री राणासँग द्विपक्षीय वार्ता गर्ने छन् । त्यसपछि उनी प्रधानमन्त्री केपी शर्मा ओली र राष्ट्रपति रामचन्द्र पौडेलसँग शिष्टाचार भेटवार्ता गरेर फर्कने छन् । परराष्ट्र मन्त्रालयका अनुसार विदेशमन्त्री बल्सुसैदीको भ्रमणका दौरान दुई मुलुकबीचको सम्बन्धलाई थप बलियो बनाउनको लागि छलफल हुने छ ।

नेपाल र ओमानबीच सन् १९७७ को जनवरी २१ मा कूटनीतिक सम्बन्ध स्थापना भएको हो । पश्चिम एसियाको महत्त्वपूर्ण मुलुक ओमानमा नेपालले सन् २०१३ को सेप्टेम्बर १ मा दूतावास खोलेको थियो । त्यसपछि राजदूतको स्तरमा बढुवा गर्दै पहिलो राजदूतका रूपमा शर्मिला पराजुली ढकाललाई पठाएको थियो । नेपाल र ओमान विश्व स्तरका विभिन्न विषयमा समान विचार र धारणा राख्छन् ।

दुवै मुलुक संयुक्त राष्ट्र संघका सदस्य हुन् भने असंलग्न आन्दोलन (नाम) मा पनि दुवै सँगै छन् । दुई मुलुक जी–७७ समूह र अन्य अन्तर्राष्ट्रिय मञ्चहरूमा साथसाथै छन् । ओमान नेपालीहरूका वैदेशिक रोजगारीका लागि पश्चिम एसियामा एउटा महत्वपूर्ण मुलुक हो । ओमानमा अहिले करिब २४ हजार नेपाली श्रमिक छन् ।

ओमानबाट यो पहिलो उच्चस्तरीय भ्रमण हुन लागे पनि नेपालबाट भने चार महत्त्वपूर्ण भ्रमण भइसकेका छन् । सन् १९८६ मा राजा वीरेन्द्र शाह र रानी ऐश्वर्या, सन् १९८५ मा परराष्ट्रमन्त्री रणधीर सुब्बा, सन् २०१७ मा उपप्रधान तथा रक्षामन्त्री भीम रावल र सन् २०१७ मा प्रधानमन्त्री शेरबहादुर देउवाले ओमानको औपचारिक भ्रमण गरिसकेका छन् ।