बजेट क्यालेन्डर अनुसार भएन, यसमा सांसदको पनि अपनत्व हुनुपर्छः सांसद गौतम

१२ भदौ, काठमाडौं । नेपाली कांग्रेसकी सांसद प्रतिमा गौतमले सरकारले ल्याउने बजेटमा सांसदहरुले अपनत्न महशुस गर्न नपाएको बताएकी छन् । बजेटमा सीमित व्यक्तिको मात्र प्रतिनिधित्व भएकाले पारदर्शी रुपमा विनियाजन पनि नभएको उनको भनाइ छ । 

प्रभावकारी रूपमा विनियोजन नभएका कारण सांसदहरुले अपनत्व लिन नसेकेको उनले बताइन् । बुधबारको प्रतिनिधिसभा बैठकमा आर्थिक कार्यविधि तथा वित्तीय उत्तरदायित्व ऐन, २०७६ लाई संशोधन गर्न बनेको विधेयकमाथिको छलफलमा सांसद गौतमले बजेट बनाउने प्रक्रिया र यसको कार्यान्वयनमा प्रत्येक पटक प्रश्न उठ्ने गरेको बताइन् ।

बजेटमा सांसदहरूले नै असहमति जनाउनुपर्ने परम्परा नै भइसकेो छ । यसमा सुधार गरिनुपर्छ । अहिले आएको यो विधेयकमा केही हदसम्म संशोधन गर्नुपर्ने देखिन्छ । बजेट प्रणालीको मुख्य कुरा बजेट क्यालेन्डर नै हो । बजेट क्यालेन्डर ठिक ठाउँबाट ठिक समयमा आयो भने त्यसले धेरै कुराहरूलाई समेट्नसक्छ । सबैले अपनत्व फिल गर्न सक्छन्, उनले भनिन् । 

वार्षिक बजेटमा जहिले पनि कर्मचारी तथा निश्चित व्यक्तिले लेखेको भन्ने आरोप लाग्ने गरेको र सांसदले अपनत्व लिन नपाएको अवस्थालाई परिवर्तन गर्नपर्ने उनको माग छ । कात्तिकबाट बजेट लेखन सुरू गर्नुपर्ने र राष्ट्रिय गौरवका आयोजनाहरूमा स्रोत सुनिश्चितता गरेर मात्र ठेक्का लगाउनुपर्ने उनको सुझाव छ ।