मेरो प्रधानमन्त्री बन्ने हैसियत हैन, छैनः आरजु

१३ भदौ, धनगढी । नेपाली कांग्रेसकी केन्द्रीय सदस्य एवं परराष्ट्रमन्त्री आरजु राणा देउवाले आफूमा प्रधानमन्त्री बन्ने हैसियत नभएको बताएकी छन् । कांग्रेस पार्टीभित्र मेरो हैसियत के हो र कति छ भन्ने कुरा मैले बुझेकी छु, पार्टीबाट प्रधानमन्त्री बनेर आउने मेरो हैसियत होइन, अनावश्यक र अफवाह फैलाउने कुरा नगरौँ, उनले भनिन् । 

बिहीबार धनगढीमा आयोजित पत्रकार भेटघाटमा उनले आरजु सम्भावित प्रधानमन्त्री भन्ने हल्लालाई ‘राम्रो कल्पना’ भनेर टिप्पणी गरिन् । अब कांग्रेसबाट प्रधानमन्त्री बन्दा शेरबहादुर देउवा नै बन्ने उनको भनाइ छ । प्रधानमन्त्री केपी शर्मा ओलीले हालै एक कार्यक्रममा महिला प्रधानमन्त्री बनाउन चाहेको सार्वजनिक अभिव्यक्ति दिएको विषय पत्रकारले उठाएका थिए । यसमा उनले आफूमा त्यो हैसियत नभएको बताइन् । 

आरजुले भनिन्, ‘प्रधानमन्त्री बन्न पहिले संसदीय दलको नेता बन्नुपर्छ । बाहिरबाट हेर्दा सभापतिकी पत्नी भन्लान, तर, पार्टीभित्रै मेरो हैसियत कति छ मलाई थाहा छ । म प्रधानमन्त्री बन्ने र भन्ने राम्रो कल्पना मात्र हो । प्रधानमन्त्री ओलीले महिला प्रधानमन्त्री बन्ने भनेर बोलेकोमा उनले धन्यवाद समेत दिइन् । यद्यपि प्रधानमन्त्री ओलीको भनाइ आफूप्रति लक्षित नभएको उनको तर्क थियो । 

‘बाहिरबाट हेर्दा एउटा देखिएला तर पार्टीभित्र मेरो आफ्नै हैसियत कति छ मलाई थाहा छ । त्यसकारण त्यो राम्रो कल्पना हो । म प्रधानमन्त्रीज्युलाई धेरै धन्यवाद दिन चाहान्छु,’ उनले भनिन्, ‘उहाँले एउटा यस्तो कुरा बताइदिनुभयो, जसले जनमानसमा एउटा कल्पना बनेको छ । तर त्यो मेरो लागि भन्नुभाजस्तो लाग्दैन ।’

प्रधानमन्त्रीको भनाइ उहाँकै पार्टीको कोही व्यक्तिप्रति लक्षित हुन सक्ने बताइन् । तर कांग्रेसबाट भने आगामी प्रधानमन्त्री शेरबहादुर देउवा नै हुने उनले बताइन् । ‘हाम्रो पार्टीको अब अर्को प्रधानमन्त्री बन्ने भनेको शेरबहादुर देउवा जी नै हो,’ आरजुले भनिन् ।