चार दिनमा १४५ अंकले घट्यो नेप्सेः बिहीबार ५३ कम्पनीले कमाए, १८८ ले गुमाए

१३ भदौ, काठमाडौं । बिहीबार शेयरबजारमा गिरावट आएको छ ।  साता कारोबारको अन्तिम दिन बिहीबार शेयर बजार ३६.८३ अंक घटेको छ । शेयर बजारसँगै कारोबार रकम थप खुम्चिएको छ । अघिल्लो दिन १३ अर्ब ७२ करोडको कारोबार भएकोमा आज १२ अर्ब २४ करोडमा खुम्चियो ।  

शेयरबजार परिसूचक (नेप्से) ३६.८३ अंकले घटेर २७४९ बिन्दुमा पुगेर रोकिएको छ । यो सातामा ४ दिन शेयर कारोबार भयो । आइतबार ८० अंकले बजार घटेको थियो । मंगलबार पुनः ११२ अंकले घट्दै परिसूचक २७८२ बिन्दुमा ओर्लिएको थियो । बुधबार अन्तिम समयमा बजारमा ३.८० अंकको वृद्धि देखियो । आज फेरि घटेको छ । यो साताको ४ दिनमा मात्रै बजार १४५ अंकले घट्यो । 
 
५३ कम्पनीको मूल्य बढ्दा १८८ को घट्यो भने २ को स्थिर रह्यो । सबै क्षेत्रका सूचक घटेका छन् । बैंकिङ १.८, विकास बैंक १.१, फाइनान्स ०.९, होटल तथा पर्यटन १.८, हाइड्रोपावर ०.१, लगानी ०.९, जीवन बीमा २.०, उत्पादन ०.९, माइक्रोफाइनान्स २, निर्जीवन बीमा १.८, व्यापार ०.६ तथा अन्य ०.५ प्रतिशत घटे ।

कुथेली बुकरी स्मल हाइड्रोपावर तथा रसुवागढी हाइड्रोपावरको मूल्य १० प्रतिशत बढ्यो । मिडसोलु हाइड्रोपावरको ८.४, मितेरी डेभलपमेन्ट बैंकको ७.८, पिपुल्स हाइड्रोपावरको मूल्य ७.६ प्रतिशत घट्यो ।
बिहीबार ५३ कम्पनीका लगानीकर्ताले कमाएका छन् । १८८ कम्पनी घाटामा जाँदा २ कम्पनीको मूल्य भने स्थिर रह्यो । आज कुल ३२२ कम्पनीको २८ लाख ३४ हजार कित्ता सेयर खरिदबिक्री हुँदा १२ अर्ब २४ करोड ३६ लाख रुपैयाँको कारोबार भएको छ ।