नवलपरासीमा सेफ्टीट्यांकी बनाउने क्रममा निसास्सिएर तीन जनाको मृत्यु

१४ भदौ, नवलपरासी । नवलपुरको विनयी त्रिवेणी गाउँपालिका– ७ रानीनगरमा निर्माणाधीन सेफ्टीट्यांकीमा निसास्सिएर तीनजनाको मृत्यु भएको छ । स्थानीय भोला सिंह क्षेत्रीको निर्माणाधीन अवस्थामा रहेको घरको ट्वाइलेटको सेफ्टी ट्यांकीभित्र काम गर्ने क्रममा बेहोस भएका तीनजनाको उपचारको क्रममा मृत्यु भएको हो ।

जिल्ला प्रहरी कार्यालय नवलपरासी (बर्दघाट सुस्तापूर्व) का प्रहरी नायव उपरीक्षक वेदबहादुर पौडेलका अनुसारका विनयी–त्रिवेणी गाउँपालिका वडा नं ७ स्थानीय ३८ वर्षीय प्रकाशसिंह क्षेत्री, १९ वर्षीय गणेश बोगटी र २८ वर्षीय मोहम्मद राजा बेहोस अवस्थामा उद्धार गरी गरिएको थियो ।

अक्सिजनको अभाव भएर बेहोस भएका उनीहरूलाई उपचारका लागि लगिएकोमा प्रकाशको परासीस्थित जिल्ला अस्पताल पृथ्वीचन्द्र अस्पतालमा ज्यान गएको प्रहरीले जनाएको छ । बोगटी र मोहम्मद राजाको भीम अस्पताल भैरहवामा मृत्यु भएको हो ।

घटनाको अनुसन्धान सुरु गरिएको जानकारी दिँदै डिएसपी पौडेलले तीनवटै शव पोस्टमार्टमपछि परिवारजनलाई बुझाइने बताए ।  सेफ्टी टंकीभित्र तीनजना बेहोस भई लडिरहेको अवस्थामा उपचारको लागि भैरहवा मेडिकल कलेज रुपन्देही पठाएकोमा चिकित्सकले मृत घोषणा गरेका हुन् । मृतकमध्ये दुईजनाको शव भीम अस्पताल भैरहवा रुपन्देहीमा र एक जनाको शव पृथ्वीचन्द्र जिल्ला अस्पताल नवलपरासी (पश्चिम) रहेको छ ।