अबको २२ महिना १५ दिन मात्र म प्रधानमन्त्रीः ओली

१५ भदौ, काठमाडौं । प्रधानमन्त्री केपी शर्मा ओलीले आफ्ना विरोधीहरूले यो कति दिन प्रधानमन्त्री बन्छ भनेर विरोध गर्न आवश्यक नभएको बताएका छन् ।  उनले आफ्नो कार्यकाल २२ महिना १५ दिन मात्र बाँकी रहेको बताएका छन् । शनिवार काठमाडौंमा आयोजित एक कार्यक्रममा प्रधानमन्त्री ओलीले आफूले पाएको कार्यकालभन्दा एक हप्ता अघि नै प्रधानमन्त्री छोड्ने बताए ।  

उनले आफूले सधैँ मुलुकको नेतृत्व गर्छु भनेर भन्न नहुने बताए । मैले सधैँ मै नेतृत्व गर्छु भनेर हुन्छ र ? मलाई मन नपराउनेहरूका लागि खुसीको खबर भन्दिन चाहन्छु । मेरो प्रधानमन्त्रीको कार्यकाल एक वर्ष १० महिना १५ दिनमात्र बाँकी छ । मन पराउनेलाई खुसी कुरा हो, उनले भने । उनले समयमै नेतृत्व हस्तान्तरण गरौँ भन्ने नीति आफ्नो रहेको बताए । 

‘त्यो भन्दा पनि हप्ता दिन अगाडि नै छाड्छु भनेको छु मैले । बढी खाउँ भन्ने हैन बरु समयमै हस्तान्तरण गरौँ भन्ने मेरो नीति छ,’ प्रधानमन्त्री ओलीले भने । ओलीले हेलिकप्टर दुर्घटनामा परेर बाँचेको कारणले पनि आफूलाई कसैको डरभर नभएको बताए । 

म पनि हेलिकोप्टर दुर्घटनामा परेको हुँ, ५ हजार फिटबाट झरेको हुँ । फेरि पनि बँचे, फाउकै जिन्दगी हो । त्यसकारण धेरै डरभर मलाई पनि छैन, प्रधानमन्त्री ओलीले भने । यसकारण, एकबारको जीन्दगी त्यत्रो हेलिकप्टर बल्दाबल्दैको जीन्दगी बचेर आए । डराउनुपर्ने अवस्थै छैन, उनले भने ।