मोरङमा दुई बालिका मृत फेला, आमा फरार

१५ भदौ, विराटनगर । मोरङको सुन्दरहरैंचामा दुई बालिकाको मृत अवस्थामा फेला परेका छन् । सुन्दरहरैँचा नगरपालिका–७ मा रहेको केरा बगानभित्र  धनकुटा पाख्रिबास ४ डिकुरे घर भई हाल मोरङ सुन्दरहरैंचा ७ मालती टोल बस्ने दिदी सिता रेग्मीको घरमा बस्दै आएका ३१ वर्षीय अर्जुन कार्कीका दुई छोरीको शव फेला परेको प्रहरीले जनाएको छ । मृत्यु हुनेमा ३ वर्षकी अर्पणा कार्की र १ वर्षकी आइका कार्की रहेका छन् ।  

उनीहरुको शव आज करिब साढे चार बजे फेला  परेको हो । बच्चा मृत अवस्थामा भेटिएको स्थानमा विषादी पनि भेटिएको जिल्ला प्रहरी कार्यालय मोरङका एसपी नवराज कार्कीले बताए । ‘अर्जुन र  श्रीमती २९ वर्षकी अस्मिता पौडेलबीच बिहान विवाद भएको एसपी कार्कीले बताए । बच्चाको शव भेटिएपछि अस्मिता भने फरार रहेकी छन् । घटनाबारे छानबिन भइरहेको प्रहरीले जनाएको छ ।