मधेश प्रदेशका डीआईजी पोखरेलमाथि कारबाहीको तयारी

१६ भदौ, काठमाडौं । चरम आर्थिक दुरुपयोग गरेको आरोपमा प्रहरी प्रधान कार्यालयले मधेस प्रदेशका डीआईजी यज्ञविनोद पोखरेलमाथि कारबाहीको तयारी थालेको छ । प्रहरी महानिरीक्षक वसन्त कुँवरको निर्देशनमा उनलाई कारवाहीको तयारी थालिएको हो ।

तराई मधेसमा तस्करीको लाइन खुलाएको र त्यसबापत घुस लिएको उजुरीका आधारमा उनलाई कारबाहीको तयारी भएको हो । उनीसँग निकट बिचौलिया पक्राउ परेका छन् भने करिब एक दर्जन घुमुवाहरूलाई प्रहरी प्रधान कार्यालयले झिकाएर अनुसन्धान गरिरहेको छ । तराईमा घुमुवा र बिचौलियामार्फत तस्करीको लाइन खुलाएर तस्करी गरेको भेटिएपछि उनीमाथि प्रहरी प्रधान कार्यालयले छानबिन अघि बढाएको थियो । उनी निकट रहेका पूर्व एसएसपीलाई परिचालन गरेर आर्थिक संकलन गरेको आरोप डीआईजी पोखरेलमाथि लागेको छ ।

प्रहरी महानिरीक्षक वसन्तबहादुर कुँवरले समेत उनको नाम नलिई केही दिनअघि एक डीआईजीमाथि कारबाहीको प्रक्रिया अघि बढ्ने बताएका थिए । डीआईजी पोखरेलले आफ्नो बैंक खाताबाटै लेनदेन गरेको प्रमाण भेटिएको स्रोतको दाबी छ । आफूलाई एमालेभित्र ईश्वर पोखरेल र माओवादीभित्र गिरिराजमणी पोखरेलको मान्छे बताउने तथा कांग्रेस भेटे आफू कांग्रेस भएको बताउने पोखरेललाई अवकाशको मुखका कारवाही थालिएको हो ।

जनकपुरका बिचौलिया जितेन्द्र कर्णलाई प्रहरीले पक्राउ गरेपछि उनीमाथि कारबाहीको आधार बनेको थियो । कर्णले डीआईजीको नाममा तस्करहरूसँग पैसा उठाउने र बुझाउने गरेको स्रोतको दाबी छ । केही घुमुवालाई प्रहरी प्रधान कार्यालयमा तानेर अनुसन्धान सुरु गरिएको छ । उनी यही असोज १६ गते अवकाशमा जाँदै छन् । उनले सर्वोच्च अदालतमा उमेर हद विरुद्ध मुद्दा दायर गरेका छन् ।