गुरुङलाई सञ्चारमन्त्रीबाट हटाउन प्रधानमन्त्रीमाथि पर्न थाल्यो दवाव, सोचेर निर्णय गर्न देउवाको सुझाव

१८ भदौ, काठमाडौं । नेपाल प्रहरीका महानिरीक्षक बशन्त कुँवरको जिब्रो थुत्नुपर्ने भन्दै आपत्ति जनक अभिव्यक्ति दिएका सञ्चार तथा सूचना प्रविधिमन्त्री पृथ्बीसुब्बा गुरुङलाई पदबाट हटाउन प्रधानमन्त्री केपी शर्मा ओलीमाथि दवाव पर्न थालेको छ । मन्त्री गुरुङको भनाइलाई लिएर नेपाली कांग्रेसका सभापति शेरबहादुर देउवाले पनि  कारवाही गर्नु  पर्यो भन्दै  भन्दै चासो राखेका छन् । 

प्रधानमन्त्री ओलीलाई यतिबेला सबैतिरबाट गुरुङको भनाइलाई कडाइका रुपमा लिएर कुनै कदम नचाले सरकारमाथि नकारात्मक प्रभाव पर्ने दवाव आएको छ । एमालेभित्रकै एक पक्षले पनि गुरुङको भनाइ आपत्ति जकन रहेको र यसले गर्दा जनस्थरबाट सरकारको नैतिकतामाथि प्रश्न उठाइन थालेको बताएको छ । कांग्रेस सभापति देउवाले मन्त्रीहरुले जथाभावी बोल्दा नराम्रो संदेश गएको भन्दै ओलीलाई सोचेर निर्णय गर्न सुझाव दिएको कांग्रेसका एक नेताले बताए ।   

सरकारका प्रवक्तासमेत रहेका सञ्चारमन्त्री पृथ्वीसुब्बा गुरुङलाई सार्वजनिक रुपमा बोल्दा सचेत हुन आफू निर्देशन दिएको ओलीले देउवालाई बताएका थिए । देउवाले यस्ता भनाइले भरखरै बनेको सरकारप्रति नराम्रो धाराणा बन्ने र कानुनी एवं नैतिक प्रश्न उठ्ने बताएका थिए । कांग्रेस सांसद शंकर भण्डारीले पनि एक विज्ञपती निकाले मन्त्री गुरुङलाई बर्खास्त गर्न प्रधानमन्त्री केपी शर्मा ओलीसँग आग्रह गरेका छन् । 

गएको शनिबार मन्त्री गुरुङले नेपाल प्रहरीका प्रहरी आईजीपी कुँवरलाई सार्वजनिक स्थलमा अपशब्द बोलेको भन्दै उनलाई प्रधानमन्त्रीले बर्खास्त गर्नुपर्ने माग उठेको हो । उनले आईजीपीको ’जिब्रो थुत्नुपर्ने’ भन्ने अभिव्यक्ति दिएका थिए । देशको शान्ति सुरक्षा कायम गर्ने जिम्मा लिएको प्रहरी संगठनको प्रमुखलाई नेपाल सरकारका प्रवक्ता तथा सूचना तथा सञ्चार मन्त्रीबाट सार्वजनिक स्थलमा अपशब्द व्यक्त भएकोमा प्रधानमन्त्रीले सञ्चार मन्त्रीलाई बर्खास्त गर्नुपर्ने दवाव बढेको हो ।