प्रहरी प्रधान कार्यलयद्वारा एकैपटक ५८७ इन्स्पेक्टरको सरुवा, विहानैदेखि आउन थाले असन्तुष्टि

१८ भदौ, काठमाडौं । नेपाल प्रहरीका ५८७ प्रहरी निरीक्षक (इन्स्पेक्टर)को सरुवा गरिएको छ । सोमबार साँझ उनीहरुको सरुवा लिष्ट सार्वजनिक गरिएको हो । भदौ १७ को निर्णयअनुसार उनीहरूको सरुवा/काज गरिएको प्रहरी प्रधान कार्यालयले जानकारी गराएको छ ।

प्रहरी महानिरीक्षकको मिति २०८१/०५/१७ गतेको निर्णयअनुसार प्रचलित नियमानुसार तलब, भत्ता समेत हाल सरुवा भएको दरबन्दीबाट पाउने गरी निम्न प्रहरी निरीक्षकहरूलाई देहाय बमोजिम सरुवा/काज गरिएको हुँदा अभिलेखमा आवश्यक ब्यहोरा जनाइदिनु हुन अनुरोध गरिएको छ, राष्ट्रिय किताबखाना (प्रहरी)लाई लेखिएको पत्रमा उल्लेख छ । 

यता, सरुवालाई लिएर बिहानैदेखि असन्तुष्टीहरु आउन थालेका छन् । सरुवा अघि पायक पर्ने क्षेत्रमा निवेदन दिन लगाएर सरुवा भने अन्यत्रै गरिएको र सुगम क्षेत्रमा जानु पर्नेलाई फेरी पनि दुर्गम क्षेत्रमा नै पठाइएको भन्दै असन्तुष्टि आएको एक प्रहरी अधिकारीले बताए । उनका अनुसार यो पटकको सरुवा निष्पक्ष नभएको अधिकांशको भनाइ आउन थालेको छ । यसअघि प्रहरी महानिरीक्षक बसन्तबहादुर कुँवरले संगठनमा १८ सयभन्दा बढी इन्स्पेक्टर रहेको र सबै सुगम तथा कमाई हुने अड्डाको मात्र खोजीमा रहेको बताएका थिए ।