घरमा पानी नहालेको निहुँमा भएको घरझगडामा दुई छोरीको हत्या, ५ दिनपछि फेला परिन आमा

१९ भदौ, विराटनगर । मोरङको सुन्दर हरैचाँमा श्रीमानसँग झगडापरेपछि दुई छोरी लिएर घर छाडेकी आमा अस्मिता कार्की ५ दिनपछि फेला परेकी छन् । उनले लिएर गएका दुई छोरी मृत्य अवस्थामा भेटिएका छन् । मृत नाबालिग छोरीहरूलाई छाडेर बेपत्ता भएकी अस्मिता बिर्तामोडमा अस्वस्थ्य अवस्थामा फेला परेको प्रहरीले जनाएको छ । 

धनकुटाको पाख्रिबास नगरपालिका–४ डिकुरेका अर्जुन कार्कीले इटहरी–भोजपुर ट्याक्सी चलाउँदै आएका थिए । मोरङ, सुन्दरहरैंचामा दिदीको परिवारसहित बसेका उनले नजिकै नयाँ घर पनि बनाउँदै थिए । जिल्ला प्रहरी कार्यालय मोरङका अनुसार शुक्रबार भोजपुरबाट फर्किंदा उनले श्रीमती र दुई छोरीका लागि माछा लिएर आएका थिए । घरमा आउने बितिकै श्रीमती अस्मितासँग विवाद सुरु भयो । विवादको कारण  थियो–बन्दै गरेको घरमा पानी नहाल्नु ।

आफूसँग विवादपछि अस्मिता दुई छोरीहरू आइका (१) र अर्पणा(३)लाई लिएर त्यही दिन राति करिब ८ बजेतिर डेराबाट निस्किएको श्रीमान अर्जुनले प्रहरीसमक्ष बयान दिएका छन् । उनी घरबाट त्यसको भोलिपल्ट दुवै बालिकाको शव अंगालो मारेको अवस्थामा शनिबार दिउँसो स्थानीय नारायण न्यौपानेको केराघारीभित्र भेटियो । नजिकै विषादीको बट्टा र अस्मिताको मोबाइल फोन पनि भेटिएको थियो । तर, अस्मिता भने त्यहाँ थिइनन् ।

आमा बेपत्ता हुँदा आमाले नै छोरीहरूलाई विष खुवाएर हिँडेको आशंका गरिएको थियो । मोरङको सुन्दरहरैँचा नगरपालिका–७ स्थित केरा बगानभित्र २ नावालिग मृत फेला परेका थिए । अर्जुनले प्रहरीलाई बताए अनुसार शुक्रबार राति अस्मिताले ‘तेरो छोरी मारेर म पनि मर्छु’ भन्दै म्यासेज गरेकी थिइन् । त्यसपछि राति नै खोजी गरे नभेटेपछि प्रहरीलाई खबर गरे ।

शनिबार दिउँसो छोरीको शव भेटेपछि प्रहरीले महिलाले पनि आत्महत्या गरेको आशंकामा नजिकै रहेको जंगलमा सर्च अपरेसन चलायो । हत्यापछि आत्महत्या गरेको आशंकामा जंगलमा तर चार दिन खोजी गर्दा भेटिइनन् । अन्य क्षेत्रमा पनि खोजी गर्दा महिला झापाको बिर्तामोडमा फेला परिन् । 

नावालिग मृत फेला परेको ५ दिनपछि आमा अस्वस्थ अवस्थामा बिर्तामोडमा फेला परेको मोरङ प्रहरीले जनाएको छ । शारीरिक हिसाबले कमजोर अवस्थामा भेटिएकी अस्मिताको विराटनगर स्थित कोशी अस्पतालमा उपचार सुरु गरिएको प्रहरीले जनाएको छ ।