गृह मन्त्रालयको लेटरहेडबाट आज सार्वजनिक बिदा भन्दै गलत सूचना सम्प्रेषण गर्ने व्यक्ति पक्राउ

१९ भदौ, काठमाडौं । आज भदौ १९ गते सार्वजनिक बिदा भन्दै गलत सूचना बनाएर सम्प्रेषण गरेको आरोपमा एक जनालाई प्रहरीले पक्राउ गरेको छ । ती व्यक्तिले आज १९ भदौमा सार्वजनिक बिदा भन्दै गृह मन्त्रालयको लेटरहेडबाट गलत सूचना सम्प्रेषण गरेका थिए । 

उनलाई चितवन प्रहरीले पक्राउ गरेको हो । पुरानो सूचनालाई मिति सच्याएर आज सार्वजनिक बिदा भन्दै भ्रम सिर्जना गराइएको आरोपमा ती युवकमाथि छानबिन भइरहेको प्रहरीले जनाएको छ । अहिले जिल्ला प्रहरी कार्यालय चितवनले सोधपुछ गरिरहेको चितवनका एसपी भावेश रिमालले जानकारी दिएका छन् । 

ती व्यक्तिबाट थप विषयहरु पुष्टि गर्नुपर्ने भएकाले नियन्त्रणमा रहेका व्यक्तिको विवरण सार्वजनिक गर्न नमिल्ने उनले बताए । गलत सूचना सम्प्रेषण गरिएपछि प्रहरीको केन्द्रीय साइबर ब्यूरोले पनि ती व्यक्तिको खोजी गरेको थियो । साइबर ब्यूरोसँग समन्वय गरेर अहिले थप छानबिन र पुष्टि गर्ने काम भइरहेको प्रहरीले जनाएको छ ।