लोकतान्त्रिक गणतन्त्रको रक्षा गरी देशलाई स्थिरता दिनु ओली र मेरो कर्तव्य होः देउवा

१९ भदौ, काठमाडौं । नेपाली कांग्रेसका सभापति शेरबहादुर देउवाले संघीय लोकतान्त्रिक गणतन्त्रको रक्षा र देशलाई स्थितरता दिने विषयमा कांग्रेस र एमालेबीच मतभेद नरहेको बताएका छन् । उनले लोकतन्त्रको रक्षा गर्नु, देशमा स्थिर सरकार दिनु र सुशासन दिने कुरा आफू र एमाले अध्यक्ष ओलीको कर्तव्यभित्र पर्ने बताएका छन् । 

बुधबार काठमाडौँमा नेपाल निजामती कर्मचारी युनियनको स्थापना दिवसको अवसरमा आयोजित कार्यक्रमलाई सम्बोधन गर्दै देउवाले प्रजातन्त्र र गणतन्त्रको रक्षाका लागि कांग्रेस र एमोलबीच कुनै मतभेद नरहेको बताए । देउवाले स्थायी सरकार बनाउनको लागि एमालेका अध्यक्ष केपी ओलीसँग सहमति गरेर आफू अगाडि बढेको बताए । 

कर्मचारी जुन पार्टीप्रति आस्था राख्ने भएपनि सरकारले निर्देशन मान्नुपर्ने उनको भनाइ छ । कांग्रेस र एमालेबीच विगतमा आ–आफ्नो मतभेद होलान् । यो व्यवस्थाको विषयमा कुनै मतभेद छैन । हामी मुख्य प्रतिस्पर्धी हौं, समस्याहरू आउँछन् मिलेर समाधान गर्नुपर्छ । ओली र मैले मिलेर समस्याको समाधान गर्छौँ । यो संघीय लोकतान्त्रिक गणतन्त्रलाई पनि रक्षा गर्नुछ । जुनसुकै पार्टीको सरकार भएपनि स्थायी सरकार हो, उनले भने । 

उनले सरकारले दिएको निर्देशन कर्मचारीले नमाने सरकार सफल हुन नसक्ने बताए । उनले भने, ‘हिजो को कुन पार्टीमा थियो आज कुन पार्टीमा छ भन्ने कुरा होइन । कोही कांग्रेसको समर्थक होला, कोही एमालेको समर्थक होला । कोही माओवादीको समर्थक होला । जुन पार्टीप्रति आस्था राख्ने भए पनि कर्मचारीले सरकारले दिएको निर्देशन मान्नुपर्ने हुन्छ ।’