सर्वोच्चको आदेश- न्यायाधीश रिक्त हुनु एक महिनाअघि नै न्यायाधीश सिफारिस गर्नु

१९ भदौ, काठमाडौं । सर्वोच्च अदालतले न्यायाधीश पद रिक्त हुनुभन्दा एक महिना अघि नै नियुक्तिका लागि सिफारिस गर्न परमादेश जारी गरेको छ ।  न्यायाधीशद्वय हरिप्रसाद फुयाल र विनोद शर्माको संयुक्त इजलासले मंगलबार एक रिटमा फैसला सुनाउँदै न्याय परिषद् र संवैधानिक परिषदसहितका विपक्षीको नाममा परमादेश जारी गरेको हो ।

न्याय परिषद् ऐन २०७३ को दफा ४ मा भएको व्यवस्था अनुसार सर्वोच्च अदालतका न्यायाधीशको पद रिक्त हुनुभन्दा कम्तीमा एक महिनाअघि नियुक्ति सिफारिस गर्न आदेश दिएको हो । २०७५ सालमा सर्वोच्च अदालतमा ४ जना न्यायाधीश पद रिक्त हुँदा पनि पदपूर्ति नभएको अवस्थामा अधिवक्ता दीपकविक्रम मिश्रले न्याय परिषद् ऐनको पालना नभएको भन्दै न्याय परिषद् सचिवालय समेतलाई विपक्षी बनाएर रिट दायर गरेका थिए ।

उक्त रिट पटक–पटक पेशी सर्दै ६ वर्षपछि मंगलबार फैसला भएको सर्वोच्च अदालतले जनाएको छ । सर्वोच्चमा प्रधान न्यायाधीशसहित २१ जना न्यायाधीश रहने संवैधानिक व्यवस्था भए पनि हाल १७ जना मात्र कार्यरत छन् । जस अनुसार अहिले पनि ४ जना न्यायाधीशको पद रिक्त रहेको छ ।