बुधबार ९०.७३ अंकले ओरालो लागेको नेप्से बिहीबार १२.१० अंकले घटेर २७२७.३६ विन्दुमा झर्यो

२० भदौ, काठमाडौं । बिहीबार नेप्से परिसूचकमा १२.१० अंकको गिरावट आएको छ । साताको अन्तिम कारोबार दिन १२.१० अंकले घटेर २७२७.३६ विन्दुमा नेप्से झरेको छ । हिजो बुधबार नेप्से परिसूचक ९०.७३ अंकले घटेको थियो ।

आज आत्मनिर्भर लघुवित्तको शेयर मुल्यमा सकारात्मक सर्किट लागेको छ भने नेपाल फाइनान्सको सबैभन्दा बढी ८.९१ प्रतिशत शेयर मुल्य घटेको छ । सबै भन्दा बढी कारोबार नेपाल फाइनान्सको भएको छ । आज नेपाल फाइनान्सको ४० करोड ५० लाख बराबरको शेयर कारोबार भएको छ । त्यस्तै अपि पावरको ६ लाख ७६ हजार ७३ कित्ता शेयर किनबेच भएको छ ।

बिहीबार १०१ कम्पनीको मूल्य बढ्दा १३८ कम्पनीको मूल्य घटेको छ । ५ कम्पनीको मूल्य स्थिर रहेको छ । कारोबार रकममा पनि भारी गिरावट आएको छ । बुधबार १२ अर्ब ९२ करोड ५६ लाख ८८ हजार २१५ रुपैयाँको कारोबार हुँदा बिहीबार ९ अर्ब ६५ करोड १५ लाख १३ हजार रुपैयाँको कारोबार भएको छ । यस दिन कुल २ करोड १ लाख ५३ हजार ९९३ कित्ता सेयर खरिदबिक्री भएको छ ।

माइक्रोफाइनान्स १.६८ तथा व्यापार सूचक ०.१६ प्रतिशत बढे भने अरु सबै घटेका छन् । बैंकिङ ०.६९, विकास बैंक ०.१३, फाइनान्स ०.५३, होटल तथा पर्यटन ०.११, हाइड्रोपावर १.०१, लगानी १.३६, जीवन बीमा ०.७४, उत्पादन ०.३३, निर्जीवन बीमा ०.५२ र अन्य ०.०१ प्रतिशत घटे । गुडविल फाइनान्सको मूल्य १० प्रतिशत बढ्यो । युनिक नेपाल लघुवित्तको ९.१४, नेस्डो लघुवित्तको ८.४३, विन नेपाल लघुवित्तको ७.५ तथा उन्नति सहकार्य लघुवित्तको ६.९ प्रतिशत मूल्य बढ्यो ।

आज बुद्धभूमि हाइड्रोको ५.७७, एनआरएन इन्फ्रास्ट्रक्चरको ५.०३, न्यादी हाइड्रोको ४.८९, मन्दाकिनी हाइड्रोको ४.८२ प्रतिशत मूल्य घटेको छ । कारोबार रकमका आधारमा नेपाल फाइनान्स, एनएलजी इन्स्योरेन्स, गुडविल फाइनान्स, हिमालयन रिइन्स्योरेन्स तथा अपी पावर क्रमश अगाडि रहे । क्षेत्रगत रुपमा हाइड्रोपावर समूहको सबैभन्दा धेरै ३ अर्ब ३७ करोडको कारोबार भएको छ ।