बान्द्रेको बाढीले बगाउँदा बागलुङमा तीन जनाको मृत्यु

२१ भदौ, काठमाडौं । बान्द्रेखोलामा खोलामा आएको बाढीले बगाउँदा बागलुङमा तीन जना युवाको मृत्यु भएको छ । बानपा–४ कुँडुलेदेखी मालिकातर्फ जाँदै गरेको ध २ प ८०१० नम्बरको मोटरसाइकल र घ १ प ९९९६ नम्बरको स्कुटरमा सवार तीन युवाको मृत्यु भएको हो । 

बान्द्रे अढाईथर बस्ने २३ वर्षीय अर्जुन सापकोटा, २२ वर्षीय अविशेक रेग्मी र २० वर्षीय कमल सापकोटाको बाढीले बगाउँदा मृत्यु भएको जिल्ला प्रहरी कार्यालय बागलुङका डिएसपी विजय यादवले जानकारी दिए ।

सापकोटा र रेग्मीको शव घटनास्थलबाट झण्डै १ सय मिटर तल फेला परेको यादवले बताए । कमलको शव खोलाले बगाएर केही तल पुÞ्र्याएको अवस्थामा भेटिएको छ ।

तीन वटै शव पोष्टमार्टमको लागि धौलागिरि अस्पतालमा ल्याईएको छ । प्रहरी निरीक्षक प्रताप पौडेल नेतृत्वको प्रहरी टोली घटनास्थलमा परिचालित भएको छ। बान्द्रेखोलामा आएको बाढीले मान्छे बगाएको खबर  पाएलगत्तै प्रहरी घटनास्थलमा पुगेको थियो ।