सामुदायिकतर्फ ६० र गैर आवासीयतर्फ ५९ करोड छात्रवृत्तिका लागि अनुदान पठाइएको छः प्रधानमन्त्री

२१ भदौ, काठमाडौं । प्रधानमन्त्री केपी शर्मा ओलीले सरकारले पठाएको छात्रवृत्ति कार्यान्वयन हुनुपर्ने बताएका छन् । उनले स्थानीय तहमा यो रकमको सही सदुपयोग भए/नभएको अनुगमन भइरहेको बताएका छन् । उनले विपन्न विद्यार्थीलाई छात्रवृत्तिका लागि अनुदान रकम पठाएको बताएका हुन् । 

शुक्रबार सामाजिक सञ्जाल फेसबुकमा उनले सबै स्थानीय तहमा विद्यार्थीहरूले छात्रवृत्ति पाए÷नपाएको सरकारले अनुगमन गर्ने जानकारी दिएका छन् । ओलीले लेखेका छन्, ‘सामुदायिक विद्यालयमा कक्षा ६–१० का विपन्न विद्यार्थीहरूको लागि वार्षिक १८ र विज्ञान विषय अध्ययन गर्नेको लागि वार्षिक २४ हजार रुपैयाँ अनुदान दिएको छ । यसका लागि रु ६० करोड अनुदान दिएको छ ।’   

गैर आवासीय छात्रवृत्ति अन्तर्गत देशभरका १५ लाख ५० हजार विद्यार्थीले छात्रवृत्ति पाउने र यसका लागि ५९ करोड रुपैयाँ रकम विनियोजन भएको उनले जानकारी दिएका छन् । 

यस्तो छ ओलीको स्टाटस

विद्यार्थीलाई छात्रवृत्तिको लागि !!

सरकारले विपन्न विद्यार्थीलाई छात्रवृत्तिका लागि अनुदान रकम पठाएको छ । सबै स्थानीय तहमा विद्यार्थीहरूले छात्रवृत्ति पाए/नपाएको अब सरकारले अनुगमन गर्ने छ ।  

सामुदायिक विद्यालयमा कक्षा ६–१० का विपन्न विद्यार्थीहरूको लागि वार्षिक १८ र विज्ञान विषय अध्ययन गर्नेको लागि वार्षिक २४ हजार रुपैयाँ अनुदान दिएको छ । यसका लागि रु ६० करोड अनुदान दिएको छ ।  

दुर्गम तथा अन्य क्षेत्रका सामुदायिक विद्यालयमा अध्ययनरत २२ वटा सूचीकृत जाति र सीमान्तकृत वर्गका गैरआवासीय विद्यार्थीका लागि प्रति विद्यार्थी वार्षिक १ हजार देखि ३ हजार ५ सय रुपैयाँसम्म छात्रवृत्तिका लागि रकम प्रदान गरिएको छ । गैर आवासीय छात्रवृत्ति अन्तर्गत देशभरका १५ लाख ५० हजार विद्यार्थीले छात्रवृत्ति पाउने छन् । यसका लागि ५९ करोड रुपैयाँ रकम विनियोजन भएको छ । 

शैक्षिक दृष्टिले पछि परेका समुदाय, अति बिकट हिमाली जिल्लाका विद्यार्थी लगायत ७ वटा लक्षित समुहका ११ हजार ४ सय विद्यार्थीको लागि मासिक ५ हजारका दरले आवासीय छात्रबृत्ति प्रदान गरिएको छ । 

माथि उल्लेखित छात्रवृति रकम प्रत्येक स्थानीय तहका प्रति विद्यार्थी लागत हिसाब गरी ससर्त अनुदानमा वित्तीय हस्तान्तरण गरिएको छ । यस सम्बन्धी कार्यविधि शिक्षा मन्त्रालयको वेबसाइटमा राखिएको छ ।