प्रधानमन्त्री ओलीभन्दा म सभ्य र सत्य बोल्छु, मैले नेपाललाई बंगलादेश बनाउन लागे भनेको छैन: प्रचण्ड

२३ भदौ, विराटनगर । नेकपा माओवादी केन्द्रका अध्यक्ष प्रचण्डले आफू प्रधानमन्त्री केपी शर्मा ओलीभन्दा सभ्य र सत्य बोल्ने नेता भएको बताएका छन् । उनले ओलीको कार्यशैली असभ्य भएको आरोप लगाउँदै आफूले त्योभन्दा सभ्य र सत्य भनाइहरु राख्ने गरेको बताएका छन् । प्रधानमन्त्री ओलीले प्रचण्डको अभिव्यक्ति असभ्य भएको भनाइको प्रतिकार गर्दै अध्यक्ष प्रचण्डले यस्तो बताएका हुन् । 

आइतबार विराटनगर विमानस्थलमा सञ्चारकर्मीसँग कुरागर्दै  प्रचण्डले  प्रधानमन्त्री ओलीले असभ्य कार्यबारे सबै जानकार रहेको बताए । उनले भने, ‘को सभ्य को असभ्य भन्ने कुरा तपाईंहरुले सुनिरहनुभएको छ नि, मैले त प्रतिनिधिसभामा नै भनेको थिएँ यति झुट, बेइमानी अनैतिकता, जालझेलको तरिकाले अपनाउनुभयो नि उहाँले (प्रधानमन्त्रीले)  मैले बोलेको के असभ्य भयो र ? ।’ 

आफू नेतृत्वको सरकारले भ्रष्टाचार विरोधी अभियान चलाएकै कारण टिक्न नदिइएको जिकिर दाहालले गरे । दाहालले आफूले नेपाललाई बंगलादेश बनाउने भनेर कहिल्यै नभनेको दाबी गरे । ‘दुईतिहाइ बहुमत छ भनेर सरकारले जेपायो त्यही नगरोस्,’ उनले भने, ‘मैले त अहंकार नगर्नु र जनताकाविरुद्ध नजानु पो भनेको हो । नेपाललाई बंगलादेश बनाउने भनेर भनेकै छैन ।’ उनले आफुले नेपाललाई ओलीले बंगलदेश बनाउन लागे भनेर कतै पनि नभनेको बताए । 

एमाले र कांग्रेसले सरकार बनाएपछि माओवादी केन्द्र पार्टी निर्माणमा जुटेको उनले बताए ।  ‘हामी सरकार नभइ पार्टी बनाउनेतिर केन्द्रित छौं,’ उनले भने, ‘अहिले माओवादी सरकार बनाउने खेलमा लाग्दैन ।’ उनले अगाडि भने, ‘उहाँहरुले पार्टी पुनःनिर्माण गर्ने राम्रो अवसर दिनुभयो । पार्टी बनाउनेतिर लाग्छौं । सरकार बनाउनेतिर ध्यान छैन ।’