नेपाल एयरलाइन्स यही हालतमा रहेसम्म नागरिक उड्डयन क्षेत्रमा सुधार ल्याउन सकिन्नः मन्त्री पाण्डे

२३ भदौ, काठमाडौं । संस्कृति, पर्यटन तथा नागरिक उड्डयनमन्त्री बद्री पाण्डेले नेपाल एयरलाइन्सको हालतमा सुधार नगरेसम्म नेपालको नागरिक उड्डयन क्षेत्रको सुधार सम्भव नभएको बताएका छन् । उनले नेपाल एयरलाइन्सलाई सुधारको बाटोमा ल्याउन सरकारले जुनसुकै कदम चाल्नुपर्ने अवस्था रहेको बताएका छन् ।  उनले एनएसीलाई फेरी आरएनएसीमा रुपान्तरण नगरेसम्म नेपाल एयरलाइन्समा सुधार नआउने बताए ।  

काठमाडौंमा आइतबार आयोजित एक कार्यक्रममा मन्त्री पाण्डेले नागरिक उड्डयनको क्षेत्रलाई सुधार्ने नेपाल एयरलाइन्सले नै भएको बताए । उनले नेपाल एयरलाइन्स सशक्त र प्रभावकारी नभएसम्म अन्य कुरामा सुधार हुन नसक्ने बताए । मन्त्री बनेपछि मन्त्रालयका सम्बन्धमा सम्पूर्ण जानकारी लिइसकेको बताउँदै उनले अब सुधारका कार्य सुरु हुने बताए ।

मन्त्री पाण्डेले भने, ‘हामीले नागरिक उड्डयन क्षेत्रलाई सुधार्नुपर्ने छ । नागरिक उड्डयनको क्षेत्रलाई सुधार्ने भनेको सरकारी एयरलाइन्सले नै रहेछ, नेपाल एयरलाइन्स जबसम्म सशक्त हुँदैन, जबसम्म प्रभावकारी हुँदैन, जबसम्म विश्वसनीय हुँदैन, तबसम्म अरु सुधार्न सक्दैन । अहिले एनएसी भन्छौँ, अब मैले त्यसलाई आरएनएसी नै भन्ने विचार गरेको छ । आरएनएसी भनेको पुरानो रोयल होइन कि, रिफर्म्ड नेपाल एयरलाइन्स हो । रिफर्म गरेपछि मात्रै यो नेपाल एयरलाइन्सले एउटा बाटो लिन्छ ।’

नेपाल एयरलाइन्सको पुनर्संरचना गरेपछि मात्रै अन्य एयरलाइन्सलाई नियमन गर्न सक्ने मन्त्री पाण्डेको भनाइ थियो । नेपाल एयरलाइन्सलाई पुनर्संरचना गरी अन्य एयरलाइन्सलाई नियमन गर्ने उनको भनाइ छ ।