२५.४६ अंकले घटेर २७०१ मा आइपुग्यो नेप्से, घाटामा १५७ कम्पनीको शेयर

२३ भदौ, काठमाडौं । धितोपत्र दोस्रो बजारमा मापक नेप्से परिसूचक आइतबार २५.४६ अंकले घटेर बन्द भएको छ । सो अंकको गिरावटसँगै नेप्से परिसूचक २७०१.९ अंकमा कायम भएको छ । बजार दिनभर उतारचढावमा रह्यो ।

८५ कम्पनीको मूल्य बढ्दा १५७ को घट्यो भने ३ को स्थिर रह्यो । १५७ कम्पनीको शेयर मूल्य घटेको छ । तीन कम्पनीको शेयर मूल्य स्थिर छ । बजार घट्दा कारोबार रकम केही बढेको छ । बिहीबार ९ अर्ब ६५ करोडको कारोबार भएकोमा आज १० अर्ब १२ करोडको भयो ।

माइक्रोफाइनान्स समूहको परिसूचक भने १.२१ प्रतिशतले वृद्धि भएको छ । यो समूहमा पर्ने कम्पनीमध्ये ४० वटाको सेयर मूल्य बढेको छ । बाँकी १० कम्पनीको सेयर मूल्य घटेको छ । माइक्रोफाइनान्स समूहका मानुसी लघुवित्त वित्तीय संस्था, सिर्जनशील लघुवित्त वित्तीय संस्थाको शेयर मूल्य १० प्रतिशतले वृद्धि भएको छ । मिड सोलु हाइड्रोपावर कम्पनीको सेयर मूल्य पनि १० प्रतिशतले बढेको छ ।

थ्री स्टार हाइड्रोपावरको शेयर मूल्य भने १० प्रतिशतले घटेको छ । कारोबारमा आएका १३ समूहमध्ये माइक्रोफाइनान्स, उत्पादन तथा प्रशोधन र म्युचुअल फन्डको परिसूचक बढेको छ । बाँकी सबै समूहको परिसूचक घटेको नेपाल स्टक एक्सचेन्ज (नेप्से)ले जनाएको छ ।