आईजीपीको कोपभाजनमा परेका एआईजी ज्ञवालीको आजबाट अवकाश

२५ भदौ, काठमाडौं । प्रहरीमा हुने विभिन्न षडयन्त्र मध्ये एक थियो, एआईजी श्याम ज्ञवालीको अकस्मात् सरुवा र उनी माथिको अनुसन्धान । उनलाई सीआईबीबाट हटाउन गरिएको प्रपञ्चको नाटक मात्र थियो छानविन र अनुसन्धानको स्टन्ट । तर उनको अवकाश हुने अघिल्लो दिनसम्म पनि त्यस बारेमा प्रहरी प्रधान कार्यालयले केही जानकारी दिएको छैन ।

भदौ २६ अर्थात् भोलि बुधबारदेखि अवकाशमा जान लागेका प्रहरी अतिरिक्त महानिरीक्षक (एआईजी) श्यामलाल ज्ञवाली केही दिन बिदामा बसेर अवकाशको तयारीमा छन् । प्रहरी प्रधान कार्यालयले औपचारिकता निभाउन बिदाईको आयोजना पनि गरिरहेको छ । ज्ञवाली तिनै व्यक्ति हुन, जसले नक्कली भुटानी शरणार्थी काण्डलाई टुंगोमा पुर्याउन हरसम्भव प्रयास गरेका थिए ।

त्यही कारण उनलाई धेरै पटक उपत्यकाका प्रहरी कार्यालयबाट सरुवा गर्ने प्रपञ्च गरियो । त्यसपछि तत्कालीन सरकारलाई उनको सरुवा गराउने बाध्यता आइलाग्यो । नियमित सरुवा भन्दा अघि नै उनको प्रहरी प्रधान कार्यालयमा सरुवा भएको थियो । त्यसपछि रवि लामिछाने गृहमन्त्री भएर आएपछि सीआईबीको प्रमुख बनाइयो । सीआईबी प्रमुख रहेका ज्ञवालीलाई अकस्मात् नयाँ गठबन्धन बनेर गृहमन्त्रीमा रमेश लेखक आएसँग आईजीपी बसन्त कुँवरको व्यक्तिगत इच्छामा प्रहरी प्रधान कार्यालयले छानवीन समिति बनेको नाटक गर्दै व्यापक प्रचारबाजी गराइयो ।

अवकाशको एक महिना मात्र बाँकी रहँदा र सीआईबीमा सरुवा भएको ५ महिना पनि नपुग्दै अपमानपूर्वक प्रधान कार्यालय सरुवा भएका ज्ञवाली केही दिन बिदामा बसेका थिए । अहिले कार्यालय आएर बिदा हुँदैछन् । तर उनीमाथि के आरोप लाग्यो, के छानवीन भयो, उनलाई नै थाहा छैन । राज्य व्यवस्था समितिको निर्देशनपछि प्रहरी प्रधान कार्यालयले विभिन्न आरोपमा परेका उजुरीमाथि छानबिन गर्न भन्दै एआईजी टेकप्रसाद राईको नेतृत्वमा समिति गठन गरेको थियो ।

तर समितिले उनीमाथि के छानवीन गरेर, के रिपोर्ट तयार पारेको छ भनेर अहिलेसम्म बाहिर सार्वजनिक गरेको छैन । ‘उहाँलाई लागेको आरोपबारे न जानकारी दिइयो, न सोधपुछ गरियो, उहाँलाई थाहै नदिई हल्ला गराएर घर पठाइँदैछ’, प्रहरी प्रधान कार्यालयका एक अधिकृतले भने । ती अधिकृतका अनुसार प्रहरी महानिरीक्षक वसन्त कुँवरले ‘इगो’ साँध्न मात्रै यस्तो गरेका हुन् । ‘प्रहरी संगठन इगोले चल्ने होइन, नीति नियम र कानुनले चल्ने हो’,ती अधिकृत भन्छन् ।

‘कसैले आरोप लगाइदिएकै भरमा विभागीय कारबाही गर्नुपर्छ भन्ने छैन’, स्रोतले भन्यो । अनुशासनहीनता र अनुसन्धानमा लापरबाही अथवा कैफियत गरेका विषय छानबिन समितिले हेर्ने भए पनि कारबाही गर्ने गरी प्रमाण फेला नपरेको दाबी स्रोतको छ । एआईजी ज्ञवाली, प्रहरी महानिरीक्षक कुँवर र छानबिन समिति संयोजक टेकप्रसाद राई एकै व्याची हुन् । ज्ञवालीमाथि महानिरीक्षक कुँवरले व्यक्तिगत इगो साँधेको चर्चा प्रहरीहरू बीच हुने गरेको छ ।

नक्कली भुटानी शरणार्थीको विषयमा ज्ञवालीकै नेतृत्वमा अनुसन्धान अगाडि बढेको थियो। उक्त अनुसन्धानका क्रममा आरोपितसँग प्रहरी महानिरीक्षक कुँवरको पनि सम्पर्क/सम्बन्ध देखिएपछि उनीहरूबीच इगो बढेको स्रोतले जनाएको छ । साे प्रमाण ज्ञवालीले नै सार्वजनिक गरिदिएको र आफूलाई बदनाम गराएको गुनासो महानिरीक्षक कुँवरको छ ।

यस्तै रवि लामिछाने गृहमन्त्री हुँदा कुँवरलाई हटाएर प्रहरी महानिरीक्षक बन्न खोजेको आरोप पनि छ । ज्ञवालीलाई ६० किलो सुन तस्करीमा जोडिएका जीवन चलाउनेसँग सम्पर्क देखिएको सहितका विभिन्न आरोप लगाइएको छ। चलाउनेले प्रहरीले खोजतलास गरिरहँदा एआईजी ज्ञवालीमाथि गम्भीर आरोप लगाएका थिए । ज्ञवालीले भने आफ्नो चलाउनेसँग कुनै लेनदेन नरहेको र भए प्रमाणित गरेर देखाउन चुनौती दिएका थिए । प्रहरीले खोजी गरिरहेको आरोपित चलाउनेले लगाएका आरोपमा कुनै सत्यता नरहेको उनको दाबी छ ।

यस्तै सेन्चुरी कमर्सियल बैंकको अनुसन्धानमा मिलेमतो गरेर पक्राउ परेका आरोपितलाई तारेखमा रिहा गरेको आरोप पनि उनीमाथि लगाइएको थियो । ज्ञवालीका केही लगानी, अनुशासन, नागरिकता र शैक्षिक प्रमाण पत्रमा उमेर फरक परेको विषयमा पनि उजुरी परेका थिए । नागरिकताको विषय पहिले नै समाधान भइसकेको थियो ।