म प्रधानमन्त्री नभएको भए मधेशका जनताले नागरिकता पाउने अवस्था हुने थिएनः प्रचण्ड

२५ भदौ, सिराहा । नेकपा माओवादीका अध्यक्ष पुष्पकमल दाहाल प्रचण्डले आफूले सरकारको नेतृत्व गर्दा वर्षौ पुराना तराई मधेसका समस्यालाई ध्यान दिएर काम गरेको बताएका छन् । आफूले सरकारको नेतृत्व गरेको बेलामा मधेसका समस्या समाधानमा ध्यान दिने प्रयास गरेको दावी गरेका छन् । उनले वर्षौं पुरानो मिटरब्याजको समस्या कानुन बनाएर समाधान गरिएको र नागरिकताविहीनलाई नागरिक पाउने अवस्था बनेको बताए । 

संविधानको रक्षा र कार्यान्वयनमा जनताको खबरदारी आवश्यक भएको बताएका छन् । माओवादी केन्द्र मिर्चैया नगर समितिले मंगलबार बिहान सिरहामा आयोजना गरेको कार्यकर्ता भेटमा उनले जनताको संघर्षका बलमा जारी संविधानको रक्षा र कार्यान्वयनमा निरन्तर खबरदारी गर्नु नागरिकको दायित्व भएको बताए ।

०७० सालको निर्वाचनमा आफूलाई निर्वाचित गराएर सिरहाको जनप्रतिनिधिका रूपमा संविधान निर्माण र कार्यान्वयनमा योगदान गर्ने अवसर दिएकामा उनले जनतालाई धन्यवाद दिए । उनले संविधानको रक्षा र कार्यान्वयनमा पनि जनताको निरन्तर साथ, सहयोग आवश्यक हुने बताए । उनले जनताको संघर्षका बलमा जारी भएको संविधानको रक्षा र कार्यान्वयनमा निरन्तर खबरदारी गर्नु जनताको दायित्व भएको बताए । 

संविधान जारी भएपछि मधेसका जनतालाई पनि विश्वासमा लिएर आफूले संविधान कार्यान्वयन गर्ने महत्त्वपूर्ण जिम्मेवारी पूरा गरेको स्मरण गर्दै उनले संविधानले उत्पीडित समुदायको अधिकार सुनिश्चित गर्न अत्यधिक प्रयत्न गरेको पनि बताए ।

‘जनताको बलिदानको जगमा निर्मित संविधानले उत्पीडित समुदायको अधिकार सुनिश्चित गर्ने अत्यधिक प्रयत्न गरेको छ’, उनले भने, ‘संघीयतासहित समावेशी र समानुपातिक प्रतिनिधित्वको सिद्धान्तले सयौँ वर्षदेखि उत्पीडनमा परेका जनतालाई अधिकार सम्पन्न बनाएको छ, अब यसको पूर्ण कार्यान्वयनमार्फत जनताको अवस्था बदल्ने बेला आएको छ, यसमा जनताको साथ सहयोग अपरिहार्य छ ।’