आगामी असारसम्मका लागि जग्गा कित्ताकाट खुल्ला, रोकिएका स्थानीय तहलाई कारोबार गर्न सहज

२५ भदौ, काठमाडौं । सरकारले असार मसान्तसम्मको समय दिएर जग्गा कित्ताकाट खुलाएको छ । मन्त्रिपरिषद बैठकले रोकिएको कित्ताकाट फेरि खुलाएको हाे । भू–उपयोग नियमावली, २०८० संशोधन गर्दै जग्गा वर्गीकरणका लागि आगामी असारसम्म समय थप गर्दै कित्ताकाट खुलाइएको हो । 

भूमि व्यवस्था, सहकारी तथा गरिबी निवारण मन्त्री बलराम अधिकारीका अनुसार मन्त्रिपरिषद् बैठकले जग्गा वर्गीकरणका लागि आगामी असार मसान्तसम्मको समय थप गर्दै कित्ताकाट खोल्ने निर्णय गरेको हो । देशभरका ७५३ पालिकामध्ये १३३ पालिकाले मात्रै हालसम्म पूर्ण जग्गा वर्गीकरण गरेका छन् । भदौ यता ६२० पालिकामा कित्ताकाट रोकिएको थियो । 

अब पालिकाहरूको आगामी असारसम्म जग्गा वर्गीकरण गरेनन् भने फेरि कित्ताकाट रोकिनेछ । अहिलेसम्म २९५ पालिकाले जग्गा वर्गीकरण नै सुरू नगरेको बताइन्छ ।  वर्गीकरण नै नगरेका र आंशिक गरेका सबै पालिकामा भदौ यता कित्ताकाट रोकिएको थियो । नियमावली संशोधन गर्दै सरकारले २०८० साउन ३० मा कित्ताकाट खुलाउने निर्णय गरेको थियो । 

संशोधित नियमावलीले पालिकालाई जग्गाको वर्गीकरण गर्न एक वर्ष समयसँगै कित्ताकाट गर्न लचिलो नीति पनि बनाएको थियो । तर उक्त समयावधिभित्र पनि पालिकाहरूले वर्गीकरण नगर्दा फेरि कित्ताकाट रोकिएको थियो । त्यसलाई असारसम्म खुलाइएको छ ।