राष्ट्रिय सभा अन्तर्गतका दुई समिति सभापतिको निर्वाचन भदौ ३१ गते हुने

२६ भदौ, काठमाडौं । राष्ट्रिय सभा अन्तर्गतको विधायन व्यवस्थापन समिति र सार्वजनिक नीति तथा प्रत्यायोजित विधायन समितिका सभापतिको निर्वाचन भदौ ३१ गते हुने भएको छ । राष्ट्रिय सभाका सचिव सुरेन्द्र अर्यालले समितिको निर्वाचनका लागि बुधबार कार्यतालिका सार्वजनिक गरेका छन् । 

राष्ट्रिय सभाका अध्यक्ष नारायण दाहालले रिक्त दुई समितिको सभापति चयनका लागि मिति तोकेका हुन् । राष्ट्रिय सभाले समितिको सभापतिको निर्वाचनका लागि कार्यतालिका पनि सार्वजनिक गरेको छ ।
 
जसअनुसार बिहान साढे १० बजेदेखि मध्याह्न साढे १२ बजेसम्म सभापतिका लागि प्रस्ताव दर्ता गर्ने, दिउँसो १ बजे दर्ता भएका प्रस्तावको दर्ता क्रमअनुसारको सूची प्रकाशन गर्ने र त्यसपछि सम्बन्धित समितिको बैठकमा प्रस्तावकले प्रस्ताव प्रस्तुत गर्ने, समर्थकले समर्थन र प्रस्तावलाई निर्णायार्थ प्रस्तुत गरिने कार्यसूची छ ।