नेपाल आइपुग्यो नेपाल एयरलाइन्सको एउटा वाइडबडी

२७ भदौ, काठमाडौं । मर्मतका लागि इटाली पठाइएको नेपाल एयरलाइन्सको वाइडबडी जहाज नेपाल आइपुगेको छ । २२ जुनमा जहाजको प्राविधिक जाँचका लागि इटाली पठाइएको थियो । ए ३३० नाइन एन–ए.एल.वाई जहाज आज काठमाडौंमा अवतरण गरेको हो । 

 निगमका अनुसार वाइडबडी जहाज आज बिहान साढे ८ बजे काठमाडौं अवतरण गरेको हो । निगमसँग अब दुई न्यारोबडी र एक वाइडबडी गरी तीनवटा जहाज उडानयोग्य व्यवस्थामा आएका छन् । यो जहाज उडानमा आएसँगै जापान उडानलाई पुनः निरन्तरता दिने निगमले जनाएको छ । 

निगमको अर्को वाइडबडी जहाज के.एल.वाई सीचेकका लागि इटालीमै छ । सो जहाज एक महिना पछि काठमाडौं आउने तालिका रहेको निगमले जनाएको छ । राष्ट्रिय ध्वजाबाहक नेपाल वायु सेवा निगमसँग अन्तर्राष्ट्रिय उडानमा चार वटा जहाज छन् ।