१७ राजदूतको सुनुवाइ सकियो, भदौ ३० गते निर्णय लिने

२७ भदौ, काठमाडौं । संसदीय सुनुवाइ समितिले प्रस्तावित १७ राजदूतको सुनुवाइ सकेको छ । निर्णय भने ३० भदौमा लिने भएको छ । समितिले बिहीबार अमेरिकाका लागि प्रस्तावित राजदूत लोकदर्शन रेग्मीको सुनुवाइ गरेको थियो । यससँगै प्रस्तावित १७ राजदूतको सुनुवाइ सकिएको हो । 

अब समितिले ३० भदौमा बिहान ९ बजे बैठक बोलाइएको छ । आजको सुनुवाइमा अमेरिका लागि प्रस्तावित राजदूत लोकदर्शन रेग्मीले अमेरिकी राष्ट्रपतिलाई नेपाल भ्रमण गराउन पहल गर्ने बताएका थिए ।  रेग्मीले अमेरिकी राष्ट्रपतिको भ्रमण र संसदलाई सम्बोधन भयो भने नेपालको छवि विश्वसनीयता बन्ने र समृद्धिको ढोका खुल्ने बताए ।

अमेरिकाका राष्ट्रपति रोनाल्ड रेगन र जोन अफ क्यानेडीले नेपालको सगरमाथाबारे चासो देखाएको भन्दै उनले भने, ‘हामीले सगरमाथा डाइलग भनेर पनि अगाडि बढाउन खोजेका छौं । यो विषयलाई लिएर अमेरिकी राष्ट्रपतिको भ्रमण गराउन सकिन्छ कि ?’

राजदूत भएर गए यसमा आफूले पहल गर्ने उनले बताए । नेपालको संसद र अमेरिकी कंग्रेसको बीचमा पनि सम्बन्ध बढाउन आवश्यक रहेको भन्दै उनले त्यसका लागि काम गर्ने बताए ।