दुर्गा प्रसाइँको अगुवाइमा ट्याक्सी चालकहरूले भक्तपुरदेखि काठमाडौंसम्म गरे प्रदर्शन

२८ भदौ, काठमाडौं । मेडिकल व्यवसायी दुर्गा प्रसाईँको अगुवाइमा ट्याक्सी चालकहरूले प्रदर्शन गरेका छन् । शुक्रबार भक्तपुरस्थित उनको निवासबाट ट्याक्सी चालकले प्रर्दशन सुरु गरेका थिए । जिल्ला प्रहरी परिसर भक्तपुरका डीएसपी मोहनमणि अधिकारीका अनुसार भक्तपुरबाट निस्केको ट्याक्सी जुलुस काठमाडौं प्रवेश गरेको छ ।  
भक्तपुरबाट ट्याक्सीसहित उनीहरू काठमाडौंतर्फ अघि बढ्दा ट्राफिक जाम भएको थियो । शुक्रबार बिहान मध्यपुर थिमि नगरपालिका वडा नम्बर ६ कमलोटारमा रहेको प्रसाईको घरबाट ट्याक्सी चालकहरूले प्रदर्शन सुरू गरेका थिए । प्रसाईको अगुवाइमा ट्याक्सी चालकहरूले प्रदर्शन गरेका हुन् ।

उनीहरुले राइड सेयरिङ एपको भाडा दर र ट्याक्सीमा हुने भाडा दर फरक हुनुपर्ने, रातो प्लेटका सवारी साधनले यात्रु बोक्न नहुनेलगायत माग राखेका छन् । करिब दुई सय वटा ट्याक्सीसहित चालकहरू  सडकमा उत्रदा सो क्षेत्रमा  निर्कै जाम भएको थियो ।