एमालेले अपब्याख्या गर्यो, हिंसा भन्ने शब्द रेकर्डबाट नहटाएसम्म संसद बैठक अवरोध हुन्छः प्रचण्ड

२९ भदौ, विराटनगर । नेकपा माओवादी केन्द्रका अध्यक्ष पुष्पकमल दाहाल प्रचण्डले हिंसा शब्दको विषयमा सदनमा भएको बहस नटुंगिएसम्म संसद चल्न नदिने बताएका छन् । नेकपा एमालेबाट जनयुद्धलाई हिंसा भनेर अपव्याख्या गर्ने र भ्रम छर्ने काम भइरहेको भन्दै त्यो विषयको सम्बोधन नभएसम्म संसदमा विरोध जारी रहने उनको भनाइ छ ।  

विराटनगर विमानस्थलमा शनिबार संचारकर्मीसँग कुरा गर्दै उनले परिवर्तन जोगाउन आफ्नो पार्टीलाई राम्रोसँग तयार गर्नुपर्छ भनेर आफूहरू लागिरहेको बताए । व्यवस्था र परिवर्तनको लागि धेरै त्याग गरेको हाम्रो पार्टी नै हो । त्यसैले परिवर्तन उल्क्याउन नदिने गरी तयारी गर्नुपर्छ भनेर हामी लागेका छौं, संसदको रेकर्डबाट हिंसा शब्द नहटेसम्म बैठक अगाडी बढ्दैन, उनले भने ।  

प्रचण्डले उपसभामुख इन्दिरा रानालाई हटाउने विषयबाट काँग्रेस–एमाले आफैं ब्याक हुने बताए । उनले भने, ‘उपसभामुख एउटा इमान्दार, जनजाति महिला, बालबच्चाको लागि ख्यातिप्राप्त हुनुहुन्छ । उहाँले टेक्निकल्ली केही कुरा नजानेर त्रुटी गर्नुभयो । त्यसको सजाय उपसभामुखबाट हटाउनेसम्म जानु हुँदैन भन्नेमा हामी दृढ छौं । सायद उहाँलाई हटाउने कुराबाट काँग्रेस एमाले नै पछि हट्नु हुन्छ होला ।’ 

अध्यक्ष प्रचण्डले संवैधानिक परिषदमा प्रधानन्यायाधीश सिफारिसका लागि ८ जनाको नाम सिफारिस भएको बताउँदै  सबै उक्त पदका लागि योग्य भएको बताए । तपाइहरुले बरियता मिच्न लाग्नु भएको कुरा छ नि ? भन्ने पत्रकारको प्रश्नमा उनले भने– प्रधानन्यायाधीशको सिफारिसका लागि ८ जनाको नाम आएको छ । हिजोको बैठकमा पनि सिनियारिटीलाई तोड्नुपर्छ भनेर कसैले भनेको छैन । त्यस्तो समस्या परेको केही छैन ।’