हिंसा शब्द रेकर्डबाट नहटाएसम्म माओवादीले संसद अवरोध जारी राख्ने

२९ भदौ, काठमाडौं । नेकपा माओवादी केन्द्रले हिंसा शब्द नहटाएसम्म संसद अवरोध जारी राख्ने निर्णय गरेको छ । नेकपा एमालेका सचिव योगेश भट्टराईले प्रयोग गरेको ‘माओवादी हिंसा’ शब्द संसदको रेकर्डबाट नहटाएसम्म प्रतिनिधि सभाको अवरोध नखोल्ने निर्णय माओवादीले गरेको हो । 

आइतबार सभामुख देवराज घिमिरेले बोलाएको बैठक बिना निष्कर्ष टुंगिएको थियो । त्यसपछि बसेको माओवादी केन्द्रका संसदहरूको बैठकले ‘माओवादी हिंसा’ शब्द नहटाएसम्म प्रतिनिधि सभाको अवरोध नखोल्ने निर्णय गरेको हो । आफूहरूले उठाएको विषयमा सत्तारुढ दलहरू गम्भीर नभएको माओवादीको निष्कर्ष छ । 

माओवादी हिंसा शब्द संसदीय रेकर्डबाट नहटाएसम्म प्रतिनिधि सभाको बैठक चल्न सक्दैन । यो संसदीय दलकै निर्णय हो । यसबाट तलमाथि हुँदैन । सभामुखको निर्णय नसच्चिएसम्म प्रतिनिधि सभाको अवरोध खुल्दैन, माओवादीले भनेको छ ।