माओवादीले अवरोध जारी राख्ने भनेपछि बस्दै नबसी स्थगित भयो प्रतिनिधि सभा बैठक

३० भदौ, काठमाडौं । प्रतिनिधिसभाको बैठक स्थगित भएको छ । आज बस्ने तय भएको बैठक बस्दै नबसी स्थगित भएको हो । बैठक भोलि दिउँसो १ बजे बस्ने संसद सचिवालयले जनाएको छ । नेकपा माओवादीले सदन अवरुद्ध जारी राख्ने निर्णय गरेपछि बैठक स्थगित गरिएको हो ।
 
आइतबार दिउँसो १ बजेका लागि बोलाइएको बैठक सुरुमा एक घण्टाका लागि स्थगित भएको थियो । त्यसपछि दिउँसो सवा तीन बजेसम्मका लागि स्थागित गरिएको बैठक सहमति जुट्न नसकेपछि फेरी स्थगित भएको संसद् सचिवालयले जनाएको छ ।

नेकपा एमालेका सांसद योगेश भट्टराईले गत भदौ १२ गते प्रतिनिधि सभा बैठकमा प्रयोग गरेको हिंसा शब्द रेकर्डबाट हटाउनुपर्ने नेकपा माओवादी केन्द्रको अडान छ । सभामुख देवराज घिमिरेले संसद सचिवालयलाई सो शब्द संसदीय मर्यादाभित्र पर्ने वा नगर्ने छानबिन गर्न निर्देशन दिएका थिए । सभामुख घिमिरेले संसदको नियमाली, कार्यव्यवस्था परामर्श समितिको बैठक र संसद सचिवालयको सुझावका आधारमा उक्त शब्द असंसदीय नभएको जानकारी गराएका थिए ।