सहकारी ठगी प्रकरणः रवि लामिछानेलाई दोषी किटान गर्दै प्रतिवेदन बुझाइँदै

३१ भदौ, काठमाडौं । सहकारी ठगीसम्बन्धी संसदीय छानबिन विशेष समितिले राष्ट्रिय स्वतन्त्र पार्टीका सभापति रवि लामिछानेकै हस्ताक्षरबाट सहकारीको रकम हिनामिना गरेको निष्कर्ष निकालेको छ । आज रातीको विहान अबेरसम्म बसेको समितिको बैठकले लामिछानेले सहकारीको रकम अपचलन गरेको निष्कर्ष निकाल्दै दोषी किटान गरेको हो ।  

गोर्खा मिडिया नेटवर्कका तत्कालीन प्रबन्ध निर्देशक, पूर्वगृहमन्त्री तथा रास्वपा सभापति रवि लामिछाने र कम्पनीका अध्यक्ष गितेन्द्रबाबु (जीबी) राई, प्रबन्ध निर्देशक लामिछाने र सञ्चालक छविलाल जोशीले संयुक्त खाता सञ्चालन गरी कर्मचारीलाई तलब भत्ता समेत सहकारीबाटै खुवाएको र बैकमा केवाईसी फर्म भरेर चेकमा हस्ताक्षर गरेको पुष्टि भएकाले लामिछानले दोषमुक्त नभएको ठहर गरेको स्रोतले जनाएको छ ।

समितिका एक सदस्यका अनुसार लामिछानेको हस्ताक्षरबाट पनि रकम निकालिएको छ । छानबिन समितिमा ९ घण्टा बयान दिँदा,गोर्खा मिडियाका लगानी, आम्दानी र खर्चबारे आफूलाई केही थाहा नभएको दाबी गर्दै आएका थिए । यो विषयमा कास्की प्रहरीले लामिछानेसँग बयान लिइसकेको छ । प्रहरीको केन्द्रीय अनुसन्धान व्यूरोले पनि अनुसन्धान गरिरहेको छ  । 

कम्पनीको लगानी, ऋण र सम्पत्तिसहितको लेखापरीक्षण प्रतिवेदनमा पनि अध्यक्षको ठाउँमा गितेन्द्रबाबु (जीबी) राई र प्रबन्ध निर्देशकका रूपमा रवि लामिछानेको हस्ताक्षर भेटिएको छ । कम्पनीका अध्यक्ष राईले जस्तै प्रबन्ध निर्देशक लामिछानेले पनि सहकारीको बचत कम्पनीमा सारेर आफ्नो लगानीका रूपमा देखाई २०७७ वैशाख ५ मा कम्पनी रजिस्ट्रार कार्यालयबाट सेयर कायम गराएका थिए । लामिछानेले कम्पनी रजिस्ट्रार कार्यालयमा हस्ताक्षर र औंठा छापसहित बुझाएको कागजमा समेत आफूले १५ प्रतिशत सेयरका लागि कम्पनीमा रकम बुझाएको उल्लेख छ । समितिले आजै प्रतिवेदन बुझाउदै छ ।