काठमाडौंबाट भरतपुर उड्न लागेको बुद्ध एयरको जहाजमा समस्या, अन्य उडान पनि प्रभावित

३१ भदौ, काठमाडौं । सोमबार विहान भरतपुरका लागि  उड्न लागेको बुद्ध एयरको एउटा जहाजमा समस्या देखिएको छ । भरतपुर उड्ने तयारीमा रहेको जहाजमा प्राविधिक समस्या देखिएपछि ट्याक्सी वेमा रोकेर यात्रुहरुलाई ओरालिएको थियो । 

यसले गर्दा अन्य उडानहरु पनि प्रभावित भएका थिए । बिहान ७.२० बजे भरतपुर जान लागेको जहाज ट्याक्सी वे मा पुगेको थियो । त्यहाँ ‘ह्विल लक’को समस्या देखिएको त्रिभुवन अन्तर्राष्ट्रिय विमानस्थलका जनरल म्यानेजर जगन्नाथ निरौलाले जानकारी दिए । उनका अनुसार विमानस्थल सामान्य रुपले सञ्चालन भए पनि उक्त समस्याका कारण केही कठिनाइ भएको बताए ।

जहाजमा समस्या देखिएपछि जहाजमा रहेका सबै यात्रुलाई ओरालिएको हो । ओरालिएका यात्रुलाई अर्को जहाजमा पठाइएको छ । अवतरणमा समस्या नभए पनि आन्तरिक उडानका जहाजहरु उड्न ढिला भएको थियो ।