रविजी झुट्ट नबोल्नुस- तपाईलाई क्लिन चिट हैन, कारवाही गर्न सिफारिश गरिएको होः कमल थापा

१ असोज, काठमाडौं । राष्ट्रिय प्रजातन्त्र पार्टी नेपालका अध्यक्ष कमल थापाले रास्वपा अध्यक्ष रवि लामिछानेलाई जनतामाझ झूट बोल्ने र झुक्याउने काम नगर्न सुझाव दिएका छन् । उनले सहकारी ठगी सम्बन्धमा संसदीय समितिले क्लिन चिट दिएको नभएर कारबाहीका लागि सिफारिश भएको टिप्पणी गरेका छन् ।

सामाजिक सञ्जालमा लेख्दै अध्यक्ष थापाले क्लीन चिट पाएको भन्दै जनताको आँखामा  छारो हाल्ने काम भएको उल्लेख गरेका छन् । साथै उनले प्रमुख दलका नेता कार्यकर्ताहरुकै संरक्षण र संलग्नतामा सहकारी ठगी र रकम अपचलन भएको देखिएपछि सबै मिलेर फासफुस पारेको आरोप समेत लगाएका छन् । 

‘क्लिन चिट’ पायो ! होइन, कारवाहीको सिफारिश भयो ! यो जनताको आँखामा छारो हाल्ने काम हो । सत्य के हो भने, प्रमुख दलका नेता कार्यकर्ताहरुकै संरक्षण र संलग्नतामा सहकारी ठगी र रकम अपचलन भएको देखिएपछि सबै मिलेर फासफुस पारे । भ्रष्ट व्यवस्था र भ्रष्ट शासकबाट देशलाई मुक्त नपारेसम्म यस्तो भइरहन्छ ।