लोसपाबाट अलग भएका राजेन्द्र महतोले घोषणा गरे मुक्ति क्रान्ति नामको नयाँ दल

१ असोज, काठमाडौं । लोसपाबाट अलग भएका राजेन्द्र महतोले नयाँ पार्टी घोषणा गरेका छन् । महतोको अध्यक्षतामा राष्ट्रिय मुक्ति क्रान्ति नेपाल गठन भएको छ । लोकतान्त्रिक समाजवादी पार्टी (लोसपा) बाट अलग भएपछि महतोले राष्ट्रिय मुक्ति क्रान्तिको नाममा अभियान चलाएका थिए । 

अभियानको मंगलबार सुरु भएको राष्ट्रिय समिति बैठकले महतोको अध्यक्षतामा दल दर्ता गर्ने निर्णय गरेको हो । उनले यही नाममा गत फागुनदेखि राष्ट्रिय अभियान चलाइरहेका थिए ।

काठमाडौंमा मंगलबारबाट सुरू भएको राष्ट्रिय मुक्ति क्रान्ति राष्ट्रिय समितिको बैठकमा महतोले नयाँ दल दर्ताको घोषणा गरेका हुन् । उनले केही समयभित्रै यो दल निर्वाचन आयोगमा दर्ता गरिने जानकारी गराएका छन् । दर्ता प्रक्रिया बारेको निर्णय जारी बैठकले नै गर्नेछ । उक्त पार्टीको अध्यक्ष राजेन्द्र महतो आफै छन् । उनको यो सातौं पार्टी हो ।