प्रधानन्यायाधीशमा सिफारिस राउत र दुई राजदूतको सार्वजनिक उजुरी आह्वान गर्ने निर्णय

३ असोज, काठमाडौं । संसदीय सुनुवाइ विशेष समितिले संवैधानिक परिषदबाट प्रधानन्यायाधीशमा सिफारिस भएका प्रकाशमानसिंह राउत र दुई देशका लागि सरकारले सिफारिस गरेका राजदूतको  सार्वजनिक उजुरी आह्वान गर्ने निर्णय गरेको छ । 

संसदीय सुनुवाइ समितिको बिहीबारको बैठकले संवैधानिक परिषदबाट नेपालको प्रधानन्यायाधीशमा सिफारिस प्रकाशमानसिंह राउत, अस्ट्रेलियाका लागि प्रस्तावित राजदूत चित्रलेखा यादव र बेल्जियमका लागि प्रस्तावित राजदूत सेवा लम्सालको संसदीय सुनुवाइ सुरु गर्न उजुरी आह्वान गर्ने भएको हो । 

समिति सभापति ईश्वरीदेवी न्यौपानेले प्रधानन्यायाधीश र दुई देशका लागि राजदूतहरूको सम्बन्धमा सार्वजनिक उजुरी आह्वान गर्ने निर्णय भएको जानकारी दिइन् । संवैधानिक परिषदले भदौ ३१ मा नेपालको प्रधानन्यायाधीशमा राउतलाई सिफारिस गर्ने निर्णय गरेको थियो । मन्त्रिपरिषदका फरक–फरक बैठकले यादवलाई अस्ट्रेलिया र लम्साललाई बेल्जियमका लागि राजदूत सिफारिस गरेको थियो । १० दिनको समय दिएर सार्वजनिक उजुरी प्रकाशन हुनेछ । त्यसपछि थप सुनुवाइ प्रक्रिया अगाडि बढ्नेछ ।

परराष्ट्र सचिव लम्साललाई मन्त्रिपरिषद्को साउन ३१ को बैठकले बेल्जियमका लागि राजदूतमा सिफारिस गरेको थियो भने यादवलाई भदौ २४ को मन्त्रिपरिषद् बैठकले अस्ट्रेलियाका लागि राजदूतमा सिफारिसको निर्णय गरेको थियो ।