संयुक्त राष्ट्रसंघको महासभामा भागलिन प्रधानमन्त्री ओली न्यूयोर्क प्रस्थान, मोदीसँगको वार्ता अनिश्चित

४ असोज, काठमाडौं । प्रधानमन्त्री केपी शर्मा ओली संयुक्त राष्ट्रसंघ (यूएन) को ७९ औं महासभामा भाग लिन अहिले अमेरिका प्रस्थान गरेका छन् । नेपालबाट २२ सदस्यीय प्रतिनिधिमण्डलको नेतृत्व गर्दै उनी अमेरिका गएका हुन् ।

प्रधानमन्त्री ओलीले संयुक्त राष्ट्रसंघको महासभाको भ्रमणका क्रममा चार महत्वपूर्ण कार्यक्रममा सम्बोधन गर्ने भएका छन् । परराष्ट्र मन्त्रालयका अनुसार प्रधानमन्त्री ओलीले 'समिट अफ द फ्युचर', ७९ औं महासभाको उच्चस्तरीय छलफल, ‘एन्टिमाइक्रोबियल रेसिस्सटेन्स’ को उच्चस्तरीय सत्र र ‘सी लेभल राइज’ को उच्चस्तरीय सत्रमा सम्बोधन गर्ने कार्यक्रम तय भएको छ । साथै, न्युयोर्कमै विभिन्न मुलुकका सांसदहरूलाई ‘पेरिस सम्झौतासँग जोडिएर फाइनान्सियल द फ्चयुरः मा सम्बोधन गर्ने कार्यक्रम रहेको छ ।

प्रधानमन्त्री ओली ती कार्यक्रम सकेर असोज १२ मा बोस्टनबाट स्वदेश फर्कने कार्यतालिका रहेको छ । यस अनुसार नेपालले संयुक्त राष्ट्रसंघ (यूएन) को ७९ औं महासभा र समिट अफ द फ्यूचर कार्यक्रम पूरा गर्नेछ । महासभा र समिट अफ द फ्युचरमा भाग लिन नेपाली प्रतिनिधिमण्डलमा प्रधानमन्त्री ओली,परराष्ट्रमन्त्री आरजु राणा देउवा सहभागी हुनेछिन् । उनी हिजै  क्यानडाबाट न्युयोर्क पुगेकी छिन् । महासभादेखि समिट अफ द फ्यूचरसहित अमेरिकामा रहँदा ओलीले चार सत्रमा ७ महत्त्वपूर्ण विषयमा सम्बोधन गर्ने, एक दर्जनभन्दा बढी साइडलाइन भेटवार्ताहरु र अन्य कार्यक्रममा पनि सहभागी हुने बताइएको छ । यद्यपि भारतीय प्रधानमन्त्री नरेन्द्र मोदीसँगको साइडलाइन वार्ता भने अझै टुंगो लागेको छैन ।

त्यो अवधिमा प्रधानमन्त्री ओली विभिन्न सम्बोधन, उच्चस्तरीय भेटवार्ता र नेपाली समुदायसँग अन्तक्रिर्या कार्यक्रममा व्यस्त रहने छन् । ओलीले असोज ६ मा समिट अफ द फ्यूचरमा सम्बोधन गर्नेछन् भने असोज १० मा महासभाको उच्चस्तरीय छलफललाई सम्बोधन गर्ने कार्यक्रम रहेको छ । यूएनका महासचिव एन्टोनियो गुटेरेसँगदेखि भुटानका प्रधानमन्त्री दासो छिरिङ तोग्बेसँग साइडलाइनमा भेटवार्ता हुने भने भारतका प्रधानमन्त्री नरेन्द्र मोदीसँग भेटवार्ताको टुंगो लाग्न अझै बाँकी छ । नेपाल भारतीय पक्षको प्रतिक्षा गरिरहेको भएपनि ओली न्युयोर्क प्रस्थान गर्दासम्म यो विषयमा भारतीय पक्षले केही जानकारी दिएको छैन । मोदी ६ र ७ मा मात्र न्युयोर्कमा हुनेछन् । नेपालले ६ गते मोदीसँग साइडलाइन भेटवार्ता गर्नको लागि प्रस्ताव गरेको छ । ‘हामीले ७ गतेको समय मागेका छौ, कुनैपनि समय उपलब्ध हुनसक्ने अपेक्षा छ’, परराष्ट्रका एक कर्मचारीले भने ।

ओलीले राष्ट्रसंघ बाहेक असोज ७ मा न्युयोर्कको कोलम्बिया विश्वविद्यालयमा ‘प्रजातन्त्र र आर्थिक समृद्धिमा नेपालको यात्रा’ विषयमा सम्बोधन गर्ने छन् भने ‘संक्रमणकालीन न्यायदेखि जलवायु न्यायसम्म नेपालको दृष्टिकोण’ सम्बन्धमा असोज ११ मा बोस्टनको हार्वर्ड विश्वविद्यालयमा सम्बोधन गर्ने कार्यक्रम छ । प्रधानमन्त्री ओलीले न्युयोर्क आएकै भोलिपल्ट असोज ५ मा नेपाली समुदायसँग अन्तरक्रिया गर्ने कार्यक्रम छ । प्रधानमन्त्री ओलीले संयुक्त राष्ट्र संघका महासचिव एन्टोनियो गुटेरेससँग पनि भेटवार्ता गर्ने कार्यक्रम तय भइसकेको छ । ओलीले आएकै दोस्रो दिन महासचिव गुटेरेससँग भेटवार्ता गर्नेछन् भने महासभालाई असोज १० मा सम्बोधन गर्ने छन् । यस्तै, ओलीका अन्य भेटवार्ताको लागि न्यूयोर्कस्थित राष्ट्रसंघका लागि नेपाली स्थायी नियोगले गृहकार्य गरिरहेको छ ।

नेपाली प्रतिनिधिमण्डलको लागि भ्रमणमा आवश्यक गृहकार्य स्थायी नियोगका प्रतिनिधि तथा राजदूत लोकबहादुर थापा र उनको टोलीले गरेको छ । साथै, नेपालीहरूसँग भेटवार्ता र अन्तरक्रियाको लागि भने न्यूयोर्कस्थित वाणिज्य दूतावासले गरेको छ । महावाणिज्य दूतावासका प्रमुख चक्र सुवेदीले नेपाली समुदायसँग कार्यक्रमको लागि सहकार्य गरेका हुन् । चौथो पटक प्रधानमन्त्री भएपछि ओलीको यो पहिलो विदेश भ्रमण हो । सन् २०२० मा भर्चुअल रुपमा महासभालाई नेपालबाटै सम्बोधन गरेपछि ओली पहिलोपटक सम्बोधन गर्न न्युयोर्क गएका हुन् ।