सहकारीको नामबाट गोरखा मिडियाको खातामा आएको साढे २२ करोडमा रवि लामिछाने संलग्न

४ असोज, काठमाडौं । प्रतिनिधिसभाले शुक्रबार सार्वजनिक गरेको सहकारी छानबिन समितिको प्रतिवेदनमा गोर्खा मिडियाको कारोबारका सम्बन्धमा रवि लामिछानेले संलग्न भएको तथ्य देखाएको छ । गारेखा मिडिया नेटवर्कको बैंक खातामा विभिन्न पाँच सहकारी संस्थाका नामबाट २२ करोड ४६ लाख ३० हजार रुपैयाँ सिधै रकम जम्मा भएको र यसमा रवि लामिछाने संलग्न भएको उल्लेख छ । 

समितिमा बयानका क्रममा गोर्खा मिडियाको आर्थिक कारोबारमा  जीबी राई नै जिम्मेवार हुने गरेको भनी उनले बयान दिएका थिए । तर, आर्थिक कारोबार हेर्दा रवि लामिछाने नै कारोबारमा संलग्न रहेको भन्दै समितिले उनको बयान यथार्थपरक नभएको निष्कर्ष निकालेको छ । समितिले प्रतिवेदनमा भनेको छ, ‘तत्कालीन प्रबन्ध निर्देशक रवी लामिछानेले आर्थिक कारोबारमा अध्यक्ष गितेन्द्रबाबु राई नै जिम्मेवार रहेको उल्लेख गरेको भएता पनि समितिलाई प्राप्त विवरणअनुसार निज रवी लामिछानेले नै कारोबार गर्न गरेको पाइएको छ ।’

समितिले १६ वटा कारोबारका विवरणहरू नै प्रतिवेदनमा समावेश गरेको छ, जसमा कुल २३ करोड ७९ लाखको कारोबार भएको देखिन्छ । प्रतिवेदन अनुसार विभिन्न पाँच सहकारी संस्थाबाट गोरखा मिडिया नेटवर्कमा ६५ करोड ५४ लाख रुपैयाँ पैसा आएको हो । जसमध्ये २२ करोड ४६ लाख रुपैयाँ सहकारी संस्थाबाट सिधै गोरखा मिडिया नेटवर्कको खातामा सहकारीको नामबाट नै रकम जम्मा भएको पाइएको हो ।

यस्तै करिब ४३ करोड ७ लाख रुपैयाँ भने अन्य व्यक्ति तथा संस्थाको नाम खडा गरी गोरखा मिडिया नेटवर्कमा ल्याएको पाइएको समितिको प्रतिवेदनमा उल्लेख छ । यसरी विभिन्न प्रक्रियाबाट सहकारीको रकम गोरखा मिडिया नेटवर्कमा ल्याइएको देखिएको प्रतिवेदनमा उल्लेख छ । सहकारी ऐनले सेयर समस्या बाहेकसँग बचत तथा ऋण कारोबार नै गर्न नपाउने व्यवस्था गरेको छ ।

‘सहकारी संस्थाहरूबाट गोरखा मिडिया नेटवर्क प्रालि लगायत कम्पनीहरूमा रकम प्रवाह भएको देखिन्छ । सूर्यदर्शन बचत तथा ऋण सहकारी संस्था, सुप्रिम बचत तथा ऋण सहकारी संस्था, सहारा चितवन बहुउद्देश्यीय सहकारी संस्था, स्वर्णलक्ष्मी बहुउद्देश्यीय सहकारी संस्था र सानो पाइला बचत तथा ऋण सहकारी संस्थाबाट जम्मा ६५ करोड ५४ लाख ८ हजार रकम गोरखा मिडिया नेटवर्क प्रालिमा प्रवाह भएको देखिन्छ,’ प्रतिवेदनमा छ, ‘उक्त रकम कम्पनीलाई सापटी, ऋण र कतिपय रकम सञ्चालकका नाममा ऋण खडा गरी कम्पनीमा र केही रकम कम्पनीका सञ्चालकको नाममा ऋण खडा गरी कम्पनीमै रकम प्रवाह भएको देखियो ।’