रविलाई पक्राउ गर्ने कि नगर्नेमा विवाद, पुरक अभियोजनका लागि छलफल

४ असोज, काठमाडौं । तत्कालीन उपप्रधान तथा गृहमन्त्री रवि लामिछानेलाई पक्राउ गरेर अनुसन्धान गर्ने कि बाहिर राखेर पुरक अभियोग लैजाने भन्ने बारेमा परामर्श शुरु भएको छ । प्रहरी महानिरीक्षक बसन्त कुँवरले प्रहरी प्रधान कार्यालयमा केही उच्च अधिकारीहरूलाई राखेर परामर्श गरेका हुन् ।

शुक्रबार दिउँसो उनले सो विषयमा परामर्श गरेको प्रधान कार्यालय उच्च स्रोतले भन्यो । प्रहरी प्रधान कार्यालयले चार वटा आरोपमा रवि माथि अनुसन्धान गर्न सकिने जानएको छ । सहकारी ठगी, किर्ते, संगठित अपराध र सम्पत्ति शुद्धिकरणमा मुद्धा चलाउन सकिने जनाएको छ । त्यसका लागि सबै विवरण संकलन गर्न र संसदीय छानबिन समितिको सिफारिसलाई आधार मान्ने प्रहरी प्रधान कार्यालयले कास्कीका एसपी मोहन थापालाई निर्देशन दिइएको छ । यसका लागि प्रहरीले पहिलो चरणमा  पूरक अभियोग लैजाने भएको छ । सूर्यदर्शन बचत तथा ऋण सहकारी प्रकरणमा लामिछानेविरुद्ध प्रमाण संकलन गरी पुरक अभियोजन लैजान भनेको हो ।

संसदीय छानबिन समितिको सिफारिसको आधारमा पूरक अभियोगको तयारी गर्न कास्की प्रहरीलाई ‘मौखिक निर्देशन’ दिइएको प्रहरी प्रधान कार्यालय स्रोतले जनाएको छ । पोखरा उपमहानगरपालिका वडा नम्बर–५ स्थित सुर्यदर्शन सहकारीको रकम हिनामिनामा लामिछाने र पूर्वउपराष्ट्रपति पुत्र दिपेश पुन पनि संलग्न रहेको भन्दै पीडितहरूले यसअघि नै पूरक उजुरी दिएका थिए । सो उजुरीको आधारमा पोखरा उपमहानगरपालिकाले रकम अपचलनबारे अध्ययन गरेर प्राविधिक प्रतिवेदन प्रहरीलाई दिइसकेको छ । प्रहरीले रवि लामिछाने गृहमन्त्री हुँदासम्म यसलाई बचाउ गर्दै आएको थियो । प्रमाण नै नभएको भन्दै राज्यव्यवस्था समितिमा आइजीपी कुँवर आफै उपस्थित भएर बचाउ गरेका थिए ।

सहकारी संस्थामा रहेको बचतकर्ताको रकम अनियमित तवरबाट गोर्खा मिडिया नेटवर्क प्रालिको खातामा आएपछि सो रकम खर्च गर्ने र गराउने प्रक्रियामा लामिछाने संलग्न रहेको संसदीय छानबिन समितिको ठहर छ । समितिले संसदमा बुझाएको प्रतिवेदन मन्त्रिपरिषद्ले कार्यान्वयन गर्ने निर्णय गरेको छ । समितिको सिफारिस अनुसार गोर्खा मिडियाका सञ्चालकहरू अध्यक्ष गितेद्रबावु (जीबी)राई, सदस्य कुमार रम्तेल तथा प्रबन्ध निर्देशक लामिछाने र सञ्चालक छविलाल जोशीविरुद्ध मुद्दा चल्ने भएको छ । सुर्यदर्शन सहकारीका कोषाध्यक्ष कुमार रम्तेल यसअघि नै पक्राउ परेका थिए । अहिले उनी मुद्दा पुर्पक्षका लागि थुनामा छन् । सुर्यदर्शन सहकारीको रकम हिनामिना प्रकरणमा यसअघि नै अदालतमा मुद्दा दर्ता भइसकेको छ । थप अनुसन्धान गर्दा रकम हिनामिनामा संलग्न देखिएकाहरूलाई पूरक अभियोग लैजान मिल्ने कानुनी व्यवस्था छ ।

लामिछाने राष्ट्रिय स्वतन्त्र पार्टीका सभापति हुन् । सुर्यदर्शन सहकारीका संचालकहरुविरुद्ध जिल्ला प्रहरी कार्यालय पोखरामा ९ सय ७१ जनाले रकम हिनामिना गरेको भन्दै जाहेरी दिएका थिए । सहकारीका पूर्वअध्यक्ष जीबी राईविरुद्ध इन्टरपोलबाट रेड नोटिस जारी भएको छ । उनी अहिले फरार छन् । सुर्यदर्शनको १ अर्ब ८ करोड रकम हिनामिना भएको प्रहरीको अनुसन्धान निष्कर्ष छ । लामिछानेविरूद्ध २०८०माघ २२मै कास्की प्रहरीमा परेको जाहेरीको आधारमा अभियोग लैजान सक्ने बताइएको छ । ‘अहिलेसम्म अभियोग लैजाने कि नलैजाने भनेर कुनै निर्णय भएको छैन,तर हामी यो विषयमा छलफल गरिरहेका छौ’ प्रहरी प्रधान कार्यालयका एक अधिकारीले भने । यसअघि प्रहरी प्रधान कार्यालय नै रोकेको अभियोजन अघि बढाउन लागिएको हो ।