नेकपा एसमा विवादः रामकुमारीसहित असन्तुष्ट नेताहरु एमालेसँग नजिकिदै

६ असोज, काठमाडौं । एमालेबाट विभाजित भएर बनेको नेकपा एकीकृत समाजवादी (एस)भित्र विवाद बढ्दै जाँदा नेताहरूबीच बोलचाल बन्द भएको छ । अध्यक्ष माधव नेपालसँग केही नेताहरूले बोलचाल नै बन्द गरेका हुन् । महाधिवेशन र पदाधिकारी निर्वाचनबाट सुरु भएको असन्तुष्टि चर्कँदै गएपछि केही नेताहरु पार्टीका औपचारिक कार्यक्रममै उपस्थित हुन छाडेका छन् भने केहीले पार्टी अध्यक्षसँग बोलचाल नै बन्द गरेर बसेका छन् ।

पदाधिकारी निर्वाचनमा पराजय बेहोरेसँगै केही नेताहरूले नेतृत्वबाट नै गुटबन्दी गरेको आरोप लगाउँदै उनीहरू पार्टी गतिविधिमा जान छाडेका हुन् । नेताहरु रामकुमारी झाँक्री, प्रेम आले, किसान श्रेष्ठ, जीवनराम श्रेष्ठ, धनबहादुर बुढा र विरोध खतिवडा, भानुभक्त जोशी, लगायतका नेताहरु पार्टी गतिविधिबाट बाहिर रहेका छन् । अमर बहादुर थापा पनि जान छाडेका छन् । उनीहरुलाई पार्टी अध्यक्ष माधव नेपालले पनि निको मानेका छैनन् । पार्टीको गतिविधिभन्दा बाहिर बस्ने, पार्टीलाई गाली गर्ने नेताहरूको हिसाबकिताब हुने भन्दै कारवाहीको चेतावनी दिएपछि उनीहरू झन चिढिएका छन् ।

उनीहरू पदाधिकारी निर्वाचन यताका पार्टीका महत्वपूर्ण बैठकहरूमा लगातार अनुपस्थित भएका हुन् । शुक्रबारको कार्यक्रममा पनि अध्यक्ष माधवकुमार नेपालले अब यसप्रकारको असन्तुष्टि पार्टीका लागि सह्य नहुने बताएका थिए । उनले असन्तुष्टिका कुरा पार्टीभित्र आन्तरिक बैठक छलफलमा गर्न सकिने तर निर्वाचनमा पराजय हुनसाथ पटक–पटक असन्तोष व्यक्त गर्नु राम्रो नभएको बताउँदै यसको हिसाबकिताब हुने चेतावनी दिएका थिए ।

‘दर्जनौं चिट बाँडिएको रहेछ, चिटमा नाम भएकाहरू पनि हारेका छन्, नभएकाहरु पनि जितेका छन् । त्यसैले चिटले मात्रै काम गरेको छैन । कमजोरी गर्नेहरूले मम भनौं । त्यसलाई हामी प्रोत्साहन गर्न चाहँदैनौँ । पार्टीका केही नेताहरूको अभिव्यक्ति पनि बाहिर आएका छन् । ती अभिव्यक्तिले पनि निकै तरंग पैदा गर्यो । त्यस्ता गल्ती आगामी दिनमा नदोहरियोस् भनेर आत्मालोचना पनि गर्नुभएको छ,’ अध्यक्ष नेपालले भनेका छन् । साथै उनले  आफू चुनावमा नजितेपछि असन्तोष पोख्दै हिँड्नु गलत भन्दै त्यस्तालाई धेरै पटक छुट दिन नसकिने बताएका थिए

गत असारमा भएको पार्टीको महाधिवेशनबाट अध्यक्ष, सम्मानित नेता र महासचिवसहित ९० केन्द्रीय सदस्यको टुंगो लाग्यो । बाँकी सहमतिमा चयन गर्ने भनिए पनि पदाधिकारीदेखि पोलिटब्युरोसम्म निर्वाचन भएको थियो । निर्वाचनमा महिला उपाध्यक्षमा उम्मेदवारी दिएकी रामकुमारी झाँक्रीले पराजय बेहोरिन । झाँक्री आफूलाई हराउन नेतृत्व नै सक्रिय भएको आरोप लगाउँदै पार्टी गतिविधिबाट टाढिने भएकी छिन् । उनले पुरानै पार्टी एमालेमा फर्कने या अन्य विकल्पबारे सोच्ने भन्ने विषयमा असन्तुष्ट नेताहरूसँग संवादमा गरिरहेकी छिन् । यसअघि पुष्पकमल दाहाल नेतृत्व सरकारमा पार्टीले सरकारमा सहभागी नगराएपछि नेतृत्वप्रति असन्तुष्ट प्रेम आले र किसान श्रेष्ठ पार्टीको सम्पर्कबाहिर रहेका छन् ।

तीमध्ये सांसद प्रेम आले केन्द्रीय सदस्यमा समेत अटाएका छैनन् । २ वर्षअघि पनि तत्कालीन शेरबहादुर देउवा नेतृत्वको सरकारबाट मन्त्री फिर्ता बोलाउने विषयमा विवाद चर्किएपछि तत्कालीन पर्यटनमन्त्री आलेसहित ६ सांसदले पार्टी नेतृत्वविरुद्ध हस्ताक्षर नै गरेका थिए । अहिले विरोध खतिवडा पनि सन्तुष्ट छैनन् । भानुभक्त जोशी र अमर थापाको  पनि उही हालत रहेको स्रोतको दावी छ । उनीहरू मध्ये एमालेसँग नजिक हुन थालेको स्रोतले जनाएको छ ।