धनुषा प्रहरीको सुरक्षामा गम्भिर लापरवाही, भेन्टिलेशन फोडेर हिरासतबाट ८ जना थुनुवा फरार

७ असोज, जनकपुरधाम । जिल्ला प्रहरी कार्यालय धनुषाको हिरासतबाट ८ जना थुनुवा फरार भएका छन् । लागूऔषध, अभद्र व्यवहार लगायत मुद्दामा पक्राउ परेका ८ जना थुनुवाहरु गएराति भेन्टिलेशन फोडेर फरार भएको धनुषाका प्रवक्ता एवं डीएसपी रञ्जन अवालेले जानकारी दिए ।

उनका अनुसार राति अन्दाजी साढे ३ बजेतिर ९ जना थुनुवाहरु फरार भएको र १ जनालाई भने केही समयपछि पक्राउ गर्न सफल भएको छ । अन्य फरार भएकाहरूको खोजी कार्यका लागि रातीदेखि नै सर्च अभियान जारी रहेको छ । धनुषाको छिमेकी जिल्लाहरू सिराहा, महोत्तरी र सीमा क्षत्रमा भारतीय प्रहरीलाई समेत खबर गरी निगरानी बढाइएको डीएसपी अवालेले बताए । 

मधेश प्रदेशको राजधानी रहेको जिल्लाको हिरासत कक्षाबाट नै थुनुवा फरार भएपछि धनुषा प्रहरीको सुरक्षा व्यवस्थामा गम्भीर लापरवाही देखिएको छ ।