रवि लामिछानेविरुद्ध कास्की प्रशासन अगाडि सहकारी पीडितको प्रदर्शन, समर्थक पनि सडकमा

७ असोज, काठमाडौं । राष्ट्रिय स्वतन्त्र पार्टीका सभापति एवं पूर्वगृहमन्त्री रवि लामिछानेलाई पक्राउ नगरिएको भन्दै सहकारी पीडितहरूले प्रदर्शन गरेका छन् । सूर्यदर्शन सहकारी पीडित बचतकर्ताले लामिछानेलाई पक्राउ गर्न माग गर्दै प्रदर्शन गरेका हुन् । यस्तै लामिछानेका समर्थक पनि सडकमा उत्रिएका छन् ।  

सहकारीको पैसा गोर्खा मिडिया मार्फत लामिछानेले दुरुपयोग गरेको भन्दै पीडितले जिल्ला प्रशासन कार्यालय कास्की बाहिर नाराबाजी गर्दै तत्काल पक्राउ गर्न माग गरेका छन् । जिल्ला प्रशासन कार्यालयको गेट अगाडि सहकारी पीडित  छन भने अगाडि शहीद चोकमा रास्वपाका नेता कार्यकर्ताले नाराबाजी गरिरहेका छन् । पीडितले लामिछानेलाई पक्राउ गर्न माग गरिरहेका छन् भने रास्वपा नेता–कार्यकर्ताले लामिछानेलाई पक्राउ नगर्न नाराबाजी गरिरहेका छन् ।

सूर्यदर्शन सहकारी पीडित र रवि समर्थक नेता–कार्यकर्ता आमने–सामने हुँदा सुरक्षा व्यवस्था कडा पारिएको प्रहरीले जनाएको छ । जिल्ला प्रशासन तथा शहीद चोक आसपासमा सुरक्षाकर्मी खटाइएको छ । जोशीलाई अदालत उपस्थित गराउने जानकारीसँगै सहकारी पीडित अदालत गेट बाहिर भेला भएर नाराबाजी सहित प्रदर्शन उत्रिएका हुन् । 

रविलाई पनि पक्राउ गर्न पुर्जी जारी हुन लागेको भन्दै रास्वपा नेता कार्यकर्ता शहीद चोकको चौतारामा भेला भएर प्रदर्शन गरेका छन् । अहिले सहकारी पीडितले बचतकर्तालाई मारेर सहकारीको पैसा गोर्खा मिडियामा गएको र त्यसलाई अपचलन गर्ने काम रविले गरेको बताएका छन् ।